ქართული ოცნების დეპუტატის ბექა დავითულიანის თქმით, ოკუპირებული ცხინვალის "რეფერენდუმზე" რუსეთის რეაქციას უნდა დაველოდოთ. დავითულიანი ამბობს, რომ საქართველომ საკუთარი "ეროვნული ინტერესებიდან გამომდინარე" უნდა იმოქმედოს და უსაფრთხოების მაღალი რისკები გაითვალისწინოს.

"ჩვენ უნდა დაველოდოთ, ასევე, რა რეაქცია ექნება რუსეთს ამაზე. და ეს იქნება მესიჯი, ისედაც არის ეს მესიჯი, მაგრამ რუსეთის პოზიცია იქნება მესიჯი საქართველოს მიმართ, კიდევ ერთი დამატებითი, რომელიც ჩვენს ტერიტორიულ მთლიანობის და სუვერენიტეტის ხელყოფასთან არის დაკავშირებული.

ჩვენ, რა თქმა უნდა, უნდა ვიმოქმედოთ ჩვენი ეროვნული ინტერესებიდან გამომდინარე ყველა ჩვენს ხელთ არსებული რესურსით და ამავდროულად, გავითვალისწინოთ ის უსაფრთხოების მაღალი რისკები და ვიმოქმედოთ მაქსიმალურად ფრთხილად, რომ ქვეყანა ამ მძიმე პოლიტიკური პირობებიდან, რომელიც შექმნილია რეგიონში, გამოვიყვანოთ მოგებული და არა კიდე უფრო დაზიანებული", — ამბობს ის.

მას შემდეგ, რაც საქართველოს ოკუპირებული რეგიონის დე ფაქტო პრეზიდენტმა, ანატოლი ბიბილოვმა განაცხადა, რომ რუსეთთან შეერთებისთვის მალე ზომებს მიიღებდა, მათ ოფიციალურ გვერდზე პროპაგანდისტული შინაარსის სხვადასხვა განცხადება გავრცელდა, მათ შორის, იმაზე, რომ რუსეთთან გაერთიანებაზე რეფერენდუმი დაიგეგმება. ე.წ. რეფერენდუმი რუსეთისთვის ნაცადი ხერხია — იგივე მეთოდები გამოიყენეს უკრაინაში, როდესაც ანექსირებული ყირიმი რუსეთის ნაწილად გამოაცხადეს.

ე.წ. სახელმწიფო სააგენტო რესზე გამოქვეყნდა პარლამენტის სპიკერისა და ე.წ. პრეზიდენტის პრესსპიკერის განცხადებები. პარლამენტის სპიკერის თქმით, ე.წ. რეფერენდუმი უახლოეს მომავალში ჩატარდება და რუსეთთან შეერთებაზე ხალხი საკუთარ აზრს გამოთქვამს. მისივე განცხადებით, არანაირი სამართლებრივი წინააღმდეგობა არ არსებობს, რომ საქართველოს ოკუპირებული რეგიონი რუსეთს შეუერთდეს.