ენგურის ხიდზე აფხაზეთის დე-ფაქტო ხელისუფლების წარმომადგენლების მიერ დაკავებული მამა-შვილის, პაატა და არჩიკო როგავების ოჯახმა დღეს საპროტესტო აქცია გამართა. ოჯახის წევრები საქართველოს ხელისუფლებისგან დაკავებულთა გათავისუფლების საქმეში დახმარებას ითხოვენ.

ტელეკომპანია რუსთავი 2-ის ცნობით, როგავების ოჯახი აცხადებს, რომ ხელისუფლება არანაირ ზომებს არ იღებს დაკავებულების გასათავისუფლებლად და ისინი იძულებულები არიან პროტესტის ამ ფორმას მიმართონ.

საქართველოს სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილის, კახა ქემოკლიძის განცხადებით, მამა-შვილის დაკავება უკანონოა და ეს საკითხი დააყენეს სწორედ გალში ინციდენტების პრევენციისა და მათზე რეაგირების მექანიზმის ბოლო შეხვედრაზე.

ქემოკლიძის თქმით, დე-ფაქტო ხელისუფლების წარმომადგენლებმა განაცხადეს, რომ როგავებს ედავებიან ე.წ საზღვრის უკანონო კვეთასა და საოკუპაციო ძალების მიმართ წინააღმდეგობის გაწევას.

უწყების წარმომადგენელმა აღნიშნა ისიც, რომ ამ პირების გასათავისუფლებლად, მსჯელობას მომავალშიც გააგრძელებენ.

დე-ფაქტო აფხაზეთის სახელმწიფო უსაფრთხოების სამსახურის ინფორმაციით, პაატა და არჩიკო როგავები საზღვრის უკანონო კვეთის ბრალდებით, გალის რაიონში, სოფელ ნაბაკევის ტერიტორიაზე, 2017 წლის 5 აპრილს დააკავეს.

საზღვრის კვეთის გარდა, აფხაზური მხარე პაატა როგავას ხელისუფლების წარმომადგენლისთვის წინააღმდეგობის გაწევაში ადანაშაულებს. სოხუმის სასამართლომ როგავებს ორთვიანი წინასწარი პატიმრობა შეუფარდა.