რუსეთის თავდაცვის მინისტრი, სერგეი შოიგუ გამოჩნდა და ამტკიცებს, რომ უკრაინაში "სამხედრო ოპერაციის" პირველი ეტაპის ძირითადი დავალებები შესრულებულია. მისი თქმით, ახლა ძირითადი ყურადღება და ძალისხმევა დონბასის "გათავისუფლებას" მიემართება.

"ერთიანობაში, ოპერაციის პირველი ეტაპის ძირითადი დავალებები შესრულებელია. საგრძნობლად შემცირებულია ურკაინის შეიარაღებული ძალების სამხედრო პოტენციალი, რაც იძლევა საშუალებას, ძირითადი ყურადღება და ძირითადი ძალისხმევა მთავარი მიზნის, დონბასის გათავისუფლებაზე მივმართოთ", — აცხადებს ის.

დაწერილი ტექსტის კითხვისას, შოიგუს არ უხსენებია ნიშნავს თუ არა ეს სხვა ქალაქებში საბრძოლო მოქმედებების შეწყვეტას, თუმცა აღნიშნა, რომ "სპეციალური სამხედრო ოპერაცია გაგრძელდება დასახული მიზნის მიღწევამდე". არც იმაზე უსაუბრია, თუ ძირითადი მიზანი დონბასის "გათავისუფლება" და სამხედრო პოტენციალის განადგურება იყო, რატომ არიან ამ დრომდე რუსული ჯარები კიევის მისადგომებთან. თავდაცვის მინისტრს არც "დენაციფიკაციის" დიად მიზანზე გაუსვამს ხაზი, რომელსაც აქამდე აქტიურად იმეორებდნენ კრემლში.

მინისტრის მტკიცებით, უკრაინაში "არსებობა შეწყვიტა" ქვეყნის საზღვაო-სამხედრო ძალებმა და მნიშვნელოვანი ზიანი მიადგა სახმელეთო და სადესანტო ჯარებს. მან ასევე ჩამოთვალა რა ზარალი მიაყენეს უკრაინას.

შოიგუმ განაცხადა, რომ პირველ აპრილს დაიწყება წვევამდელების გაწვევა და იმის მტკიცება დაიწყო, რომ მათი რაოდენობა, 134 000, იმაზე ნაკლები იქნება, ვიდრე წინა წელს. ამტკიცებდა იმასაც, რომ მათ ცხელ წერტილებში არ გაუშვებენ და მხოლოდ წვრთნები ჩაუტარდებათ. თუმცა უკრაინაში ომმა აჩვენა, რომ სწორედ ასე ატყუებდნენ სხვა წვევამდელებსაც, რომლებიც უკრაინაში გაუშვეს.

ახლახანს გამოჩენილი შოიგუ დასავლეთის ქვეყნებსაც მიწვდა და უპასუხისმგებლო უწოდა. მისი თქმით, აკონტროლებენ ცნობებს "უკრაინისთვის ანტისარაკეტო სისტემების მიწოდებაზე" და რეალიზაციის შემთხვევაში "ადეკვატური რეაგირება" ექნებათ.