ოსკარის ყოველწლიურ დაჯილდოებას კინომოყვარულების გარდა მოდის გულშემატკივრებიც აქტიურად ადევნებენ ხოლმე თვალს და შემდეგ კიდევ დიდი ხნის განმავლობაში განიხილავენ ცნობილი ადამიანების ჩაცმულობას წითელ ხალიჩაზე.

ამერიკული კინოაკადემიის წლევანდელი დაჯილდოების ცერემონიაზე განსაკუთრებული ყურადღება იყო მიმართული ჰოლივუდის ამომავალი ვარსკვლავის, ზენდეიასკენაც. მსახიობს თეთრი სატინის ბლუზა და Valentino-ის გრძელი, თვლებით გაწყობილი კაბა ეცვა. აღსანიშნავია, რომ ზენდეია ამ იტალიური ბრენდის სახე გახდა 2020 წელს. როგორც Valentino-ის ინსტაგრამგვერდიდან ვიგებთ, ამერიკელი მსახიობის ჩაცმულობაზე პიერპაოლო პიჩოლიმ იზრუნა, სტილისტი კი ლოუ როუჩი გახლდათ.

ზენდეიას ჩაცმულობამ, რომელსაც ვერცხლისფერი ყელსაბამი და სამაჯურებიც ამშვენებდა, ფანებს შერონ სტოუნის გასული საუკუნის დროინდელი სტილი მოაგონა. კინოვარსკვლავს 1998 წელს, ასევე ოსკარის დაჯილდოებაზე, მსგავსად ჩახსნილი თეთრი ბლუზა და ვერა ვონის ასეთივე სტილის კაბა ეცვა.

სხვათა შორის, როუჩის სტილით შემოსილმა ზენდეიამ სხვა ვარსკვლავის ჩაცმულობა წინათაც გაახსენა ბევრს. მაგალითად, 2021 წლის BET Awards-ზე მსახიობს Versace-ის გრძელი იისფერი კაბა ეცვა, რომელიც იმავე ღონისძიებაზე, 2003 წელს, ბიონსეს სტილს ძალიან ჰგავდა.

რაც შეეხება ოსკარებს, ზენდეიას მონაწილეობით გადაღებულმა Dune-მა წლევანდელ დაჯილდოებაზე ყველაზე მეტ, ექვს ნომინაციაში, შეძლო გამარჯვების მოპოვება.

ასევე იხილეთ: