უკრაინაში რუსული მედიის, The Insider-ის ჟურნალისტი ოქსანა ბაულინა გარდაიცვალა. რუსული მედიების ინფორმაციით, ის კიევში სარედაქციო დავალებას ასრულებდა, როცა დაბომბვა დაიწყო.

როგორც The Insider წერს, ის იღებდა ნგრევას დედაქალაქის პოდოლსკის რაიონში, რაც რუსული ჯარების დაბომბვამ გამოიწვია. მათივე თქმით, მასთან ერთად გარდაიცვალა ერთი მშვიდობიანი მოქალაქე, ორი თანმხლები პირი კი საავადმყოფოში გადაიყვანეს.

The Insider-ში მისვლამდე ოქსანა მუშაობდა ალექსეი ნავალნის ანტიკორუფციულ ფონდში. მას შემდეგ რაც ორგანიზაცია ექსტრემისტული ორგანიზაციების სიაში მოხვდა, იძულებული გახდა დაეტოვებინა რუსეთი.

"როგორც კორესპონდენტი, ოქსანა გაემგზავრა უკრაინაში, სადაც მან მოახერხა რამდენიმე რეპორტაჟის გაკეთება ლვოვიდან და კიევიდან. The Insider ღრმა მწუხარებას გამოხატავს ოქსანას ოჯახისა და მეგობრების მიმართ.

ჩვენ გავაგრძელებთ უკრაინის ომის გაშუქებას, მათ შორის რუსული სამხედრო დანაშაულების ჩათვლით, როგორიცაა განურჩეველი დაბომბვა საცხოვრებელი უბნების, სადაც მშვიდობიანი მოქალაქეები და ჟურნალისტები იღუპებიან", — წერს გამოცემა.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში