მთავარი პროკურატურის განცხადებით, სასამართლომ გაიზიარა ბრალდების მტკიცებულებები და პირველი ლედის, მაკა ჩიჩუას ძმა, მიხეილ მგალობლიშვილი, რომელიც ცეცხლსასროლი იარაღის უკანონოდ ტარებისთვის იყო ბრალდებული, 24 აპრილის სხდომაზე დამნაშავედ სცნო. საბოლოოდ, მას ოთხი წლით პატიმრობა მიუსაჯეს.

პროკურატურის მიერ გავრცელებულ განცხადებაში ნათქვამია, რომ მიხეილ მგალობლიშვილი წარსულში არაერთხელ იყო ნასამართლევი:

"2008 წლის 25 მარტს იგი ნარკოტიკული საშუალების უკანონოდ მოხმარებისთვის და პოლიციის მიმართ წინააღმდეგობის გაწევისთვის გასამართლდა. დანაშაულთა ერთობლიობით განესაზღვრა ორი წლით თავისუფლების აღკვეთა, ასევე ორი წლით პირობითი მსჯავრი და ჯარიმა 3000 ლარი. 2010 წლის 27 თებერვალს მგალობლიშვილი კვლავ გასამართლდა ნარკოტიკული საშუალების უკანონოდ მოხმარებისთვის და საბოლოო სასჯელის სახედ და ზომად განესაზღვრა ორი წელი და ცხრა თვე პირობითი მსჯავრი და ჯარიმა 2000 ლარი. 2011 წლის 4 მაისს იგი გასამართლდა განზრახ მკვლელობის მცდელობის ჯგუფურად ჩადენის ბრალდებით და განაჩენთა ერთობლიობით, სასჯელის სახედ და ზომად განესაზღვრა 17 წელი და ერთი თვე თავისუფლების აღკვეთა. 2013 წლის 14 თებერვლის განჩინებით, ამნისტიის შესახებ კანონის საფუძველზე მას დანიშნული სასჯელი შეუმცირდა, ხოლო 2013 წლის 25 დეკემბრის პრეზიდენტის განკარგულების საფუძველზე გათავისუფლდა საპატიმრო სასჯელის შემდგომი მოხდისგან".

ბრალდების მხარის მტკიცებით, 2017 წლის 11 იანვარს, თბილისში, ლორთქიფანიძის ქუჩაზე მგალობლიშვილი უკანონოდ ატარებდა BROWNING-ის კონსტრუქციის იარაღს ერთი მჭიდით და ერთი ვაზნით, ასევე თავის საცხოვრებელ სახლში ინახავდა ქარხნული წესით დამზადებულ 7,65 მმ კალიბრის იარაღს - BERETTA.

უწყება აცხადებს, რომ ბალისტიკური ექსპერტიზის დასკვნით, ამოღებული იარაღები მიეკუთვნება ცეცხლსასროლ იარაღთა კატეგორიას და ვარგისია სროლისთვის, ხოლო ამოღებული ვაზნა წარმოადგენს საბრძოლო მასალას და ვარგისია გამოსაყენებლად.