პოტენციური რუსული ოკუპაციის პირობებში უკრაინელი LGBTQ+ ადამიანების არამხოლოდ სიცოცხლეს ემუქრება საფრთხე, არამედ მათი იდენტობის თავისუფლებასაც. რუსეთი LGBTQ+ თემის მიმართ თავის დამოკიდებულებას არ მალავს და ქვეყნის კანონი "გეი პროპაგანდის" შესახებ ბავშვებისთვის LGBTQ+ ადამიანების ცხოვრებასთან დაკავშირებული სხვადასხვა სახის მასალის ჩვენებას კრძალავს.

რუსეთის უახლეს ისტორიაში ჩეჩნეთში განხორციელებული "გეი წმენდა" მსოფლიოსთვის ერთ-ერთ შემზარავ მოვლენად მიიჩნევა. რუსეთის უკრაინაში შეჭრამ კი მსოფლიო კიდევ ერთხელ ჩააგდო შოკში, რასაც ემატება ცნობები იმის შესახებ, რომ რუსებისთვის LGBTQ+ ადამიანები ერთ-ერთი მთავარი სამიზნეა.

ფოტო: Ukraine Pride

"რუსეთს უკრაინელი ჟურნალისტების, აქტივისტებისა და გეების უფლებების დამცველი ადამიანების სია აქვს, რომლებსაც ან მოკლავენ, ან ბანაკებში გაგზავნიან. ეს კი ადამიანის უფლებების კატასტროფა იქნება", — ნათქვამია აშშ-ის გაეროსადმი მიწერილ წერილში.

ომის დაწყებიდან სამი კვირის შემდეგ უკრაინულ არმიას საკმაოდ ბევრი LGBTQ+ ადამიანი შეუერთდა, რომლებმაც რუსეთის წინააღმდეგ იარაღით ბრძოლა გადაწყვიტეს. "თუ რუსეთი გაიმარჯვებს, ეს სიბნელეს ნიშნავს. უკრაინაში თავისუფლება და სხვადასხვა თემის უფლებები აღარ იარსებებს", — აცხადებს აქტივისტი ვლად შასტი.

"ბევრ LGBTQ+ ადამიანს ვიცნობ, რომლებიც დისკრიმინაციის გამო რუსეთიდან, ბელარუსიდან და ყაზახეთიდან უკრაინაში გადმოვიდნენ საცხოვრებლად. თუ რუსეთი გაიმარჯვებს, ეს ადამიანები ყველაფერს დაკარგავენ, რასაც ბოლო წლებში მიაღწიეს", — ამბობს რეჟისორი და უკრაინული გეი პრაიდის ერთ-ერთი ორგანიზატორი, იურა დვიჟონი.

უკრაინაში LGBTQ+ ადამიანები დიდხანს იბრძოდნენ საკუთარი უფლებებისთვის და მნიშვნელოვან შედეგებსაც მიაღწიეს. რუსეთის უკრაინაში შეჭრა კი ამ ადამიანების სიცოცხლესა და მათ უფლებებს საფრთხის ქვეშ აგდებს. ამ ეტაპზე უკრაინული გეი პრაიდის დამფუძნებლები არმიაში მებრძოლი LGBTQ+ ადამიანების მხარდაჭერასა და ფინანსურ დახმარებაზე არიან ორიენტირებული.