თბილისის მერიის ზედამხედველობის საქალაქო სამსახურის წარმომადგენლებმა, გვიან ღამით, მეტროსადგურ "ახმეტელის" მიმდებარედ განთავსებული გარევაჭრობისთვის განკუთვნილი კონსტრუქციები გაიტანეს. აღნიშნული ტერიტორია ,,თბილსერვის ჯგუფმა“ დაასუფთავა.

როგორც მერია აცხადებს, ზედამხედველობის საქალაქო სამსახურის წარმომადგენლებმა მოვაჭრეები რამდენჯერმე გააფრთხილეს, შეეწყვიტათ გარევაჭრობა.

თბილისის მერის მოადგილის, გიგა ნიკოლეიშვილის განცხადებით, გარემოვაჭრეებს უკანონო საქმიანობის გაგრძელების უფლება აღარ მიეცემათ:


„ჩვენ მათ ბაზრობებზე შესვლას და სამეწარმეო საქმიანობის იქ გაგრძელებას ვთავაზობთ. პირობები იგივე იქნება - პირველი 6 თვის მანძილზე საიჯარო გადასახადს არ გადაიხდიან".

მერიის პრესსამსახურის ცნობით, გლდანის ტერიტორიაზე ერთ-ერთი ბაზრის ხელმძღვანელობას უკვე მიმართა 80-მდე მოვაჭრემ. ადმინისტრაციის განცხადებით, დღესვე კიდევ 120 ადგილის შეთავაზება შეუძლიათ, თუმცა, საჭიროების შემთხვევაში, კიდევ შეძლებენ დამატებითი ადგილების გამოყოფას.

თბილისის მერიამ უნებართვო გარევაჭრობის წინააღმდეგ ბრძოლა მიმდინარე წლის მარტიდან დაიწყო, თავდაპირველად ტერიტორიიდან გაიყვანეს მეტრო "მარჯანიშვილის" მიმდებარედ მომუშავე ადამიანები. გარევაჭრობა ასევე აიკრძალა დინამოსა და ვაგლზის მოედნის ტერიტორიაზე.