პოლონეთის პრემიერმინისტრის, მათეუშ მორავიეცკის განცხადებით, ყველა ქვეყანას აქვს უფლება აირჩიოს გზა, რომელიც სურს და საქართველოს ადგილი არის ევროკავშირში. აღნიშნული განცხადება მორავიეცკიმ ბათუმში ღარიბაშვილთან შეხვედრის შემდეგ გააკეთა.

"ის აგრესია, რომელსაც ჰქონდა ადგილი 2008 წელს, დღემდე იგრძნობა საქართველოში, ამიტომ პოლონეთი დღემდე მხარს უჭერს და გააგრძელებს საქართველოს მხარდაჭერას ევროკავშირის გზაზე. ჩვენ დარწმუნებულები ვართ, რომ ყველა ქვეყანას აქვს უფლება აირჩიოს ის გზა, რომელიც თვითონ სურს, ამიტომ მე მინდა აღვნიშნო, რომ საქართველოს ადგილი არის ევროკავშირში", — განაცხადა პოლონეთის პრემიერმინისტრმა.

პოლონეთის პრემიერმინისტრი საქართველოში სამუშაო ვიზიტით დღეს, 17 მარტს ჩამოვიდა. მან შეხვედრა გამართა ირაკლი ღარიბაშვილთან, რის შემდეგაც მათ მედიასთან ერთობლივად გააკეთეს კომენტარი.