ცოტა ხნის წინ მილიარდერმა ილონ მასკმა ტვიტერზე სახელი გადაიკეთა და ილონა მასკი დაირქვა. ამის მიზეზი კი ჩეჩნეთის ლიდერის, რამზან კადიროვის წერილი გახდა, რომელშიც მან მასკს "ილონა" (Elona) დაუძახა. ილონა ქალის სახელია და, როგორც ჩანს, მასკის სახელის გადაკეთებით კადიროვს მისი დამცირება უნდოდა.

ყველაფერი კი იმით დაიწყო, რომ ილონ მასკმა ტვიტერზე პუტინი პირისპირ ბრძოლაში გამოიწვია:

"ვლადიმერ პუტინს პირისპირ ბრძოლაში ვიწვევ. ფსონი უკრაინაა", — დაწერა მასკმა.

გამოწვევას პუტინი არა, მაგრამ რამზან კადიროვი ტელეგრამზე გამოეხმაურა. წერილი ილონ მასკმა ტვიტერზე გაასაჯაროვა. წერილში კადიროვი მასკს ურჩევს, რომ პუტინს არ შეეჯიბროს. მისი თქმით, ილონი უბრალოდ ბიზნესმენი და ტვიტერის მომხმარებელია, პუტინი კი — პოლიტიკოსი, რომელიც მსოფლიოს შიშის ზარს სცემს.

"ვლადიმერ ვლადიმეროვიჩისთვის შენი ცემა სპორტსმენისთვის შეუფერებელი საქციელი იქნება, რადგან სუსტი მოწინააღმდეგე ხარ. გირჩევნია, ეგ კუნთები გაავარჯიშო, რათა ნაზი ილონას ნაცვლად სასტიკი ილონი იყო", — წერს კადიროვი.

კადიროვმა ილონს რუსეთსა და ჩეჩნეთში რამდენიმე ადგილიც დაუსახელა, სადაც ვარჯიში შეეძლებოდა.

კადიროვის წერილის შემდეგ ილონმა სახელი დროებით გადაიკეთა და "ილონა" დაირქვა. რა თქმა უნდა, უპასუხოდ არც წერილი დაუტოვებია:

"მადლობა შემოთავაზებისთვის, მაგრამ ასეთი შესანიშნავი წვრთნა ზედმეტად დიდ უპირატესობას მომცემდა. თუ მას [პუტინს] ბრძოლის ეშინია, ვპირდები, რომ მხოლოდ მარცხენა ხელს გამოვიყენებ. ცაცია არ ვარ.

ილონა."

ამ ისტორიას ილონ მასკის დედა, მეი მასკიც გამოეხმაურა:

"რა ლამაზი ხარ, ილონა", — ამ წარწერით გადატვიტა მეი მასკმა "ილონას" ფოტო.

ილონმა ძველი სახელი მალევე დაიბრუნა, თუმცა სავარაუდოდ, ცვლილების შესახებ კადიროვი მაინც შეიტყობდა. შესაძლოა, ეს კადიროვსა და მასკს შორის საჯარო მიმოწერის ბოლო შემთხვევა სულაც არ იყოს და წინ უფრო საინტერესო დიალოგიც გველის.

ილონ მასკი უკრაინას მხარდაჭერას საჯაროდ უცხადებს. მასკმა უკრაინას Starlink-ის ინტერნეტით სარგებლობის შესაძლებლობაც მისცა და პრეზიდენტ ვოლოდიმირ ზელენსკის პირადადაც გაესაუბრა.