24 თებერვალს რუსეთმა უკრაინაში ომი დაიწყო, რომელიც დღემდე გრძელდება. ბუნებრივია, ამ დროის განმავლობაში უკრაინა მსოფლიოს ყურადღების ცენტრში მოექცა. უამრავი ადამიანი დაინტერესდა ამ საოცარი ქვეყნის ისტორიით, ხალხითა და ენით.

მსოფლიოში ენის შემსწავლელი წამყვანი აპლიკაციის, Duolingo-ის მონაცემების მიხედვით, უკრაინაში ომის დაწყების შემდეგ აპლიკაციაში უკრაინული ენის შესწავლის მსურველთა რიცხვი 485%-ით გაიზარდა. დუოლინგოს წარმომადგენლების განცხადებით, ყველაზე დიდი ზრდა აშშ-ში დაფიქსირდა, რადგან პროცენტულად ყველაზე მეტი მომხმარებელი აპლიკაციას სწორედ ამ ქვეყანაში ჰყავს. მეორე ადგილზე კი პოლონეთია — როგორც ჩანს, პოლონელები უკრაინელი ლტოლვილების დასახმარებლად უკრაინული ენის სწავლას ცდილობენ.

კომპანიამ უკრაინასა და უკრაინელებს მხარდაჭერა გამოუცხადა და მათ დასახმარებლად ახალი ინიციატივებიც დააანონსა:

"უკრაინაში ომის დაწყების შემდეგ დუოლინგოზე უკრაინული ენის შემსწავლელთა რიცხვი საგრძნობლად გაიზარდა. ძალიან გვიხარია, რომ ადამიანები უკრაინულ კულტურას აფასებენ და მხარს უჭერენ, თუმცა გვგონია, რომ ამით შემოსავლის მიღება არასწორი იქნება. ჩვენ უკრაინულის შემსწავლელი ადამიანებისგან მიღებულ თანხას უკრაინის დასახმარებლად გადავრიცხავთ", — განაცხადა აპლიკაციის შემქმნელმა.

ამასთან, უკრაინელები და უკრაინელი ლტოლვილების მასპინძლები დუოლინგოს Premium ვერსიით უფასოდ ისარგებლებენ. უკრაინელები კი უნივერსიტეტის აპლიკაციისთვის საჭირო ინგლისური ენის დონის დამადასტურებელ ტესტებს უფასოდ ჩააბარებენ.

ამავე თემაზე: