ვოლოდიმირ ზელენსკიმ რუსული ჯარის შესახებ იხუმრა და თქვა, რომ ისინი იარაღს უკრაინელებს აწვდიან, რადგან რუსული საბრძოლო ტექნიკის დიდი ნაწილი მიტოვებულია ან უკვე დაკავებულია.

"როგორც ადრე, მტერი ისევ დაბნეულია. ისინი მსგავს წინააღმდეგობას არ ელოდნენ. რუსმა ჯარისკაცებმა ეს იციან, თუმცა მათი ოფიცრები ამას ვერ აანალიზებენ. რუსი ჯარისკაცები ბრძოლის ველიდან გარბიან და აღჭურვილობასაც ტოვებენ", — განაცხადა ზელენსკიმ თავის ვიდეომიმართვაში.

"ჩვენ მიტოვებულ რუსულ ტექნიკას უკრაინის დასაცავად ვიყენებთ. ასე რომ, რუსული ჯარები ჩვენი არმიის იარაღის ერთ-ერთი მომწოდებელია. მათ ასეთი რამ კოშმარშიც კი ვერ წარმოედგინათ", — დასძინა ზელენსკიმ.

უკრაინის შეიარაღებული ძალების განცხადებით, კონფლიქტის დაწყებიდან რუსეთმა 404 ტანკი და 1279 ჯავშანტრანსპორტიორი დაკარგა, თუმცა ეს ინფორმაცია არც რუსეთს და არც სხვა ქვეყნებს არ დაუდასტურებიათ. უკრაინის თავდაცვის მინისტრის, ალექსეი რეზნიკოვის თქმით, უკრაინული ქარხნები საბრძოლო მოქმედებების დროს დაზიანებული რუსული აღჭურვილობის შეკეთებას ცდილობენ.

"მწარმოებლები და ქარხნები მუშაობას აგრძელებენ, რათა სამხედრო შეკვეთები შეასრულონ და დაზიანებული რუსული საბრძოლო ტექნიკა შეაკეთონ. ბრძოლის დროს მთელმა ქვეყანამ უნდა იმუშაოს. საბოლოოდ კი, მტერს საკუთარი იარაღით მოვკლავთ", — ამბობს რეზნიკოვი.