საფრანგეთში საპრეზიდენტო არჩევნების პირველი ტური მიმდინარეობს. სამი დღის წინ, პარიზში პოლიციელზე მომხდარი თავდასხმის შემდეგ, ქვეყანაში უსაფრთხოების ზომები განსაკუთრებით გამკაცრებულია. ქვეყნის მასშტაბით, საარჩევნო უბნებს, 50 ათასი პოლიციელი და შვიდი ათასი სამხედრო იცავს.

პრეზიდენტობის თერთმეტ კანდიდატს შორის, წინასწარი გამოკითხვებით ოთხი მათგანი, ულტრა მემარჯვენე და პოპულისტი მარინ ლე პენი, ცენტრისტი და ახალი პარტია ონ მარშის ლიდერი, ემაუელ მაკრონი, რესპუბლიკელი ფრანსუა ფიონი, და კომუნისტი, ჟან ლუკ მელანშონი, ლიდერობს. დაახლოებით 47 მილიონი ამომრჩეველი გააკეთებს არჩევანს მათ შორის.

BBC-ის ცნობით, თუკი ხმების 50 პროცენტზე მეტს ვერცერთი მიიღებს, რაც მოსალოდნელია კანდიდატების რაოდენობიდან გამომდინარე, არჩევნების ბედს შვიდ მაისს დაგეგმილი მეორე ტური გადაწყვეტს.

არჩევნების მეორე ტურში, სავარაუდოდ, ერთმანეთს ემანუელ მაკრონი და მარინ ლე პენი დაუპირისპირდებიან. ამ ორ კანდიდატს, საგარეო პოლიტიკის და ევროკავშირის მიმართ მკვეთრად განსხვავებული პოზიცია აქვთ. ლე პენის გამარჯვების შემთხვევაში, ის აპირებს რეფერენდუმის ჩატარებას, ქვეყნის მიერ ევროკავშირის წევრობის გადახედვის მიზნით.

საარჩევნო უბნები დღეს, ადგილობრივი დროით 8 საათზე გაიხსა და 20 საათზე დაიხურება, რასაც მალევე ეგზიტპოლების შედეგებიც მოჰყვება.