ოპოზიციონერი პოლიტიკოსი გიგი უგულავა ე.წ. ძიუდოისტის საქმეზე უდანაშაულოდ ცნეს. საქმე ეხება 2019 წელს აეროპორტში მომხდარ ინციდენტს.

მოსამართლემ გადაწყვეტილება ახლახანს გამოაცხადა და განმარტა, რომ ფიზიკური დაპირისპირების არსებობას ორივე მხარე ადასტურებს და ექსპერტიზითაც დასტურდება, რომ ორივეს ჰქონდა დაზიანებები, თუმცა საქმეში საკმარისი მტკიცებულებები არ იყო.

"მხარეების მიერ განვითარებული ვერსიებიდან, რომელი ვერსიაა რეალური და სინამდვილის შესატყვისი, ამის გადასაწყვეტად სასამართლოს სჭირდება დამატებითი, ნეიტრალური მტკიცებულებები, რომლებიც მისცემენ შესაძლებლობას, ერთის მხრივ გაიზიაროს რომელიმე მხარის განვითარებული ვერსია, ან პირიქით უარყოს. ასეთი დამატებითი მტკიცებულებები არ იქნა სასამართლოში წარმოდგენილი. [...]

თქვენს მიერ განვითარებული ვერსიები რჩება ვერსიებად, ვარაუდის დონეზე და ყოველგვარი ვარაუდი, მოგეხსენებათ, კონსტიტუციური სტანდარტის მიხედვით, თუ ვერ დადასტურდება კანონით დადგენილი წესით, უნდა გადაწყდეს ბრალდებულის სასარგებლოდ. აქედან გამომდინარე, გიორგი უგულავა წარგენილ ბრალდებაში ცნობილი უნდა იქნეს უდანაშაულოდ", — განაცხადა მოსამართლე ბადრი კოჭლამაზაშვილმა.

უგულავას ბრალი სისხლის სამართლის კოდექსის 126-ე მუხლის პირველი ნაწილით ჰქონდა წარდგენილი, რაც ძალადობას გულისხმობს. 2019 წლის დეკემბერში უგულავამ და გოკა გაბაშვილმა განაცხადეს, რომ აეროპორტში 2 უცნობი პირი დაესხათ თავს. მოგვიანებით კი უგულავამ განაცხადა, რომ პოლიცია მას ძალადობას ედავებოდა ბადრი გავაშელაშვილზე, რომელიც პროფესიით ძიუდოისტია.