21 აპრილს, თბილისში სასტუმრო ქორთიარდ მერიოტთან, 12 საათზე ორი პარალელური აქცია გაიმართება.

პირველად დემონსტრაცია ცენტრალური ევროპის უნივერსიტეტის მხარდამჭერებმა, აუდიტორია 115-მა და CEU-ს კურსდამთავრებულებმა დააანონსეს. ისინი უნგრეთის ხელისუფლების მიერ CEU-ს წინააღმდეგ მიღებულ კანონს გააპროტესტებენ.

რაც შეეხება დემონსტრანტთა მეორე ჯგუფს, ისინი ნაციონალისტები და ანტილიბერალები არიან უნგრეთის სახელმწიფოს "ანტილიბერალური პოლიტიკის მხარდასაჭერად" იკრიბებიან.

უნგრეთის პრემიერმინისტრი, ვიქტორ ორბანი მთავრობის სხვა წევრებთან ერთად თბილისს დღეს ეწვია.

უნგრეთის ხელისუფლებამ დაჩქარებული წესით მიიღო ახალი კანონი, რომელიც ცენტრალური ევროპის უნივერსიტეტს დახურვას, ან სხვა ქვეყანაში გადასვლას აიძულებს. ვიქტორ ორბანი ჯორჯ სოროსისა და მისი ფონდი ღია საზოგადოების წინააღმდეგია.

ცენტრალური ევროპის უნივერსიტეტი 1991 წელს, კომუნიზმის კოლაფსის შემდეგ, ბუდაპეშტში დაარსდა. ამჟამად უნივერსიტეტში 1 400-მდე სტუდენტი სწავლობს.