უკრაინის პრეზიდენტის ვოლოდიმირ ზელენსკის თანაპარტიელი და მისი ნდობით აღჭურვილი პირი, დავით არახამია ქართული ოცნების თავმჯდომარის, ირაკლი კობახიძის კრიტიკის ობიექტი გახდა. კობახიძე მას ენმ-სთან კავშირებში სდებს ბრალს და ამბობს, რომ უკრაინა მათთვის "არახამია არ არის".

ბრიფინგი, რომელზეც მმართველი გუნდის თავმჯდომარეს ქვეყნის ისტორიაში ერთ-ერთ უმნიშვნელოვანეს ამბავზე — ევროკავშირის წევრობისთვის კანდიდატი ქვეყნის სტატუსის მოთხოვნაზე უნდა ესაუბრა, სულ სხვანაირად დაიწყო. კობახიძემ დრო ჯერ პარტნიორი ქვეყნის, უკრაინის პრეზიდენტის გადაწყვეტილების კრიტიკას დაუთმო, ელჩის გაწვევაზე. შემდეგ კი, ტრადიციულად, ნაციონალური მოძრაობისთვის მოიცალა.

ამჯერადაც, როგორც ყოველთვის, კობახიძემ ყველაფერში ენმ დაადანაშაულა და ისიც კი თქვა, რომ ამ პარტიას უკრაინის ხელისუფლების გადაწყვეტილებებზე გავლენა აქვს. ერთ-ერთ არგუმენტად მან სწორედ არახამია მოიყვანა.

"აშკარაა კოორდინირებული მცდელობა საქართველო ჩათრეული იქნას სამხედრო კონფლიქტში, რასაც ჩვენ არ დავუშვებთ. აღნიშნული მცდელობის კოორდინაცია საქართველოდან ხორციელდება ნაციონალური მოძრაობის მიერ, რომელსაც, როგორც ყველასთვის ცნობილია, მრავლად ჰყავს წარმომადგენლები უკრაინის ხელისუფლებაში, მათ შორის, პრეზიდენტის უშუალო გარემოცვაშიც. დავით არახამია, პრეზიდენტის ნდობით აღჭურვილი პირი, როგორც მიხეილ სააკაშვილმა გუშინ თავად აღნიშნა, მისი "დაფრთიანებულია".

უკრაინის ხელისუფლებაში დღემდე საკმაოდ მაღალ პოზიციებს იკავებენ ყოფილი გენპროკურორი, ზურაბ ადეიშვილი და სხვა ქართველი კრიმინალები. თავად მიხეილ სააკაშვილიც დღემდე რჩება რეფორმების საბჭოს ფორმალურ ხელმძღვანელად. ასეთ პირობებში, მათ უკრაინის ხელისუფლების გადაწყვეტილებებზე გავლენის მოხდენა, ბუნებრივია, მარტივად შეუძლიათ", — თქვა კობახიძემ.

თუმცა ქართული ოცნების თავმჯდომარე მხოლოდ ამას არ დასჯერდა და არახამია იმ ქართველ მაღალჩინოსნებთან ერთად ახსენა, რომლებსაც მანამდე კრიმინალები უწოდა. თან ისიც დააყოლა, რომ ეს ხალხი მათთვის უკრაინა არ არის.

"ჩვენთვის უკრაინა არის არა მიხეილ სააკაშვილი, ზურაბ ადეიშვილი, გია ლორთქიფანიძე ან დავით არახამია, არამედ პირველ რიგში უკრაინელი ხალხი, რომელიც იმსახურებს სუვერენიტეტს, ტერიტორიულ მთლიანობას, დამოუკიდებლობასა და თავისუფლებას. ამ პრინციპების დასაცავად საქართველო თავისი შესაძლებლობის ფარგლებში მაქსიმუმს აკეთებს და გააკეთებს", — თქვა მან.

აღსანიშნია, რომ კობახიძის ამ განცხადებას წინ უძღოდა სააკაშვილის პოსტი, რომელშიც ექსპრეზიდენტი წერდა, რომ უკრაინაში არახამიას პოლიტიკური კარიერა მის პარტიაში დაიწყო და ჰოლანდიაში გაგდების შემდეგ, ის ზელენსკისთან გადავიდა.

კობახიძის განცხადებას უკვე უპასუხეს ენმ-ში. ნიკა მელიამ თქვა, რომ ეს არის პირდაპირი თავდასხმა უკრაინაზე რუსების ინტერესების სასარგებლოდ და მსგავსი რიტორიკა არის არსობრივად ანტიევროპული.

"მაშინ, როდესაც ერთიანი, თავისუფალი სამყარო მხარდაჭერას უცხადებს უკრაინას, მაშინ, როდესაც ევროპის პარლამენტი, ფეხზე ამდგარი, რა კადრებიც გუშინ ვიხილეთ, ტაშს უკრავს უკრაინის მებრძოლ პრეზიდენტს, მაშინ, როდესაც მომსწრენი ვართ მსოფლიო საზოგადოების არნახულ კონსოლიდაციისა და სოლიდარობის უკრაინის მიმართ, საქართველოს მთავრობა რუსეთის, ბელარუსისა და ყირგიზეთის კვალად, საჯაროდ ესხმის თავს პრეზიდენტ ზელენსკის და უკრაინელ ხალხს.

ქართული ოცნება, ასევე, თავს ესხმის უკრაინის მთავარ მომლაპარაკებელს მტერთან, აფხაზეთიდან დევნილს, ბატონ არახამიას და რუსების და კრემლის მსგავსად, ბატონ არახამიას კრიმინალს უწოდებს", — განაცხადა ნიკა მელიამ.

განახლება: სტატიის თავდაპირველ ვერსიაში ფოტოზე გამოტანილ ციტატაში გამოტოვებული იყო სიტყვა "არ", რაც არსებითად ცვლიდა კობახიძის აზრს, ამიტომ დაზუსტდა და შეიცვალა.