საზოგადოებრივი მაუწყებლის ტექნიკური დირექტორი, თეონა მაზმიშვილი ამბობს, რომ მაუწყებლის გენერალურ დირექტორად ვასილ მაღლაფერიძის არჩევისა და მის მიერ სამოქმედო გეგმის გაჟღერების შემდეგ არხი პრესტიჟული და პოპულარული გახდა. მაზმიშვილის თქმით, ამ მიზეზით, მათ დასაქმების სურვილით ბევრი პროფესიონალი მიმართავს.

"სხვადასხვა [ყველა] ტელევიზიიდან თვითონ გვიკავშირდებიან უკვე თანამშრომლები, რომლებსაც აქვთ სურვილი, დატოვონ არსებული პოზიცია და მოვიდნენ ჩვენთან სამუშაოდ, საკმაოდ პოპულარული გახდა საზოგადოებრივ მაუწყებელზე მუშაობა," - On.ge-ს განუცხადა არხის ტექნიკურმა დირექტორმა, რომელის თქმითაც, მაუწყებელში ახალი სტრუქტურის ამუშავების შემდეგ თუ ვაკანსია იქნება, ამის შესახებ ინფორმაცია საჯაროდ გახდება ცნობილი.

მაზმიშვილის თქმით, პროფესიონალიზმის ნიშნით შეირჩა მაუწყებლის ახალი სამი ოპერატორი, რომელიც მანამდე GDS-ზე მუშაობდნენ. მაზმიშვილიც მანამდე ამ არხზე მუშაობდა, ისევე როგორც საზოგადოებრივ მაუწყებელში ბოლო რამდენიმე თვეში დასაქმებული 20-მდე თანამშრომელი. ყველა მათგანი საზოგადოებრივ მაუწყებელზე GDS-ის გადაცემა 20/30-ის ყოფილი პროდიუსერის, ვასილ მაღლაფერიძის თანამდებობაზე არჩევის შემდეგ დასაქმდა. გარდა ამისა, საზოგადოებრივი მაუწყებლის თანამშრომელი გახდა ტელეკომპანია იმედის რამდენიმე ჟურნალისტი.