ბიძინა ივანიშვილი თავის ღია წერილში 2011 წლის 7 ოქტომბერს გამოქვეყნებულ წერილს იხსენებს და ქართული ოცნების მოსვლამდე ქვეყანაში არსებულ სიტუაციას აფასებს. მისი განცხადებით, წინა ხელისუფლება ორმაგი სტანდარტებით მართავდა ქვეყანას:

"ერთ დიდ ციხედ გადაქცეული მთელი ქვეყანა, ასეულობით ათასი პატიმარი და პრობაციონერი იმას ნიშნავდა, რომ ლამის მთელი მოსახლეობა პატიმრების ჭირისუფლად იყო ქცეული და ციხის კარს შეჰყურებდა. ტოტალური მოსმენები, თვალთვალი, ფარული გადაღებები, დასმენა და შანტაჟი ჩვეულებრივ მოვლენად აღიქმებოდა".

ივანიშვილის თქმით, წინა ხელისუფლება სრულად აკონტროლებდა მედიას. ხელისუფლების მიმართ კრიტიკული დამოკიდებულება კი ისჯებოდა:

"მედია ამბობდა და აჩვენებდა მხოლოდ იმას, რასაც კარნახობდნენ. ქვეყანას მძიმე ტვირთად აწვა ელიტური კორუფცია, ერთ პატარა ჯგუფს ყველაფრის უფლება ჰქონდა, დანარჩენს - არაფრის. ადამიანები დაშლილ ტელეფონებს მალავდნენ და საკუთარ ოჯახებშიც კი ჩურჩულით საუბრობდნენ. ვისაც ხელისუფლების მიმართ კრიტიკულ დამოკიდებულებას შეატყობდნენ, სამსახურებიდან აგდებდნენ, ქონებას ართმევდნენ, ცემდნენ, აპატიმრებდნენ, ციხეში სასტიკად აწამებდნენ და თუ საჭიროდ მიიჩნევდნენ, კლავდნენ კიდეც"!

ივანიშვილის განცხადებით, სააკაშვილის გუნდი, თავიანთი მიზნის განსახორციელებლად პატრიარქს და ეკლესიას ებრძოდა:

"ძალაუფლებით გათავხედებული სააკაშვილის კლანი განუსაზღვრელი ვადით გეგმავდა ხელისუფლებაში დარჩენას. ისინი ღიად ქადაგებდნენ ქართველი კაცის ძირისძირობამდე გარდაქმნისა და რაღაც “ახალი ადამიანის” ჩამოყალიბების აუცილებლობის შესახებ, რაც სინამდვილეში ადამიანებისთვის ტვინების გამორეცხვას და ყველაფრის მკადრებელ ზომბებად გაწვრთნას ნიშნავდა. ისინი არავის ინდობდნენ, ვისი ავტორიტეტიც ამ მიზნის განხორციელებაში ხელს უშლიდა და ამიტომ ებრძოდნენ ასე თავგამოდებით პატრიარქსაც და მთლიანად ეკლესიას".

ღია წერილში ივანიშნილი აცხადებს, რომ წინა ხელისუფლების დროს მმართველი გუნდი ტოტალურად აყალბებდა არჩევნებს და დიდი რაოდენობით "ნაძარცვ" ფინანსებს იყენებდა ზოგიერთი პოლიტიკოსის თუ ლობისტური ჯგუფის კეთილგანწყობის მოსაპოვებლად თუ მათთვის მცდარი შეხედულების შესაქმნელად.

ქართული ოცნების რიგით მეოთხე ყრილობაზე დაანონსებული ღია წერილი ბიძინა ივანიშვილმა 30 მაისს გამოაქვეყნა, რომელშიც ყოფილი პრემიერი საქართველოში დღეს არსებულ მდგომარეობაზე მისეულ ხედვებსა და სამომავლო გეგმებზე საუბრობს.

ბიძინა ივანიშვილის ღია წერილი