საქართველოში ევროკავშირის ელჩი კარლ ჰარცელი ოპოზიციონერი დეპუტატებისთვის მანდატის შეწყვეტის საკითხზე ელჩის მიმართ ქართული ოცნების კრიტიკას პასუხობს და ამბობს, რომ არ იცის რა იყო არასამართლიანი მის განცხადებაში და ამიტომ რთულია მისთვის ამაზე კომენტარის გაკეთება.

"არ ვიცი რა არის არასამართლიანი რომელიმე განცხადებაში, რთულია კომენტარის გაკეთება მათ განცხადებებზე. მათემატიკური ფორმულა ასე მუშაობს, რომ პარლამენტში რაც უფრო ნაკლებია ათვისებული მანდატები, მით უფრო ნაკლებია პლურალიზმი. ევროკავშირი ბევრს მუშაობდა და ძალიან დიდი ძალისხმევაც ჩადო, რომ პარლამენტი ყოფილიყო ინკლუზიური, მათ შორის, 19 აპრილის შეთანხმების გათვალისწინებით, მაგრამ როგორ აისახება ეს პროცესი შემდგომ საპარლამენტო მუშაობაზე, ჯერჯერობით უცნობია, მათ შორის, ფრაქციების დაკომპელქტების ნაწილში. ვნახოთ რა იქნება", — თქვა ელჩმა.

16 თებერვალს კარლ ჰარცელმა განაცხადა, რომ ოპოზიციონერი დეპუტატებისთვის მანდატის შეწყვეტა შესაძლოა, პოლიტიკური ინკლუზიურობისა და დემოკრატიული პლურალიზმის ხარჯზე მოხდა. მისი თქმით, ევროკავშირი კვლავ მოუწოდებს ხელისუფლებას და ოპოზიციას, რომ პარლამენტი მთავარი პოლიტიკური დებატებისა და წინსვლისთვის გამოიყენონ. ელჩმა ასევე აღნიშნა, რომ კვლავ ვერ ხედავს ინსპექტორის სამსახურის მოულოდნელად და ნაჩქარევად დაშლის ობიექტურ მიზეზებს.

ამის პასუხად ქართული ოცნების თავმჯდომარემ, ირაკლი კობახიძემ თქვა, რომ ჰარცელის განცხადებები სახელმწიფო ინსპექტორის სამსახურის გაუქმებისა და ოპოზიციონერი დეპუტატებისთვის მანდატის შეწყვეტასთან დაკავშირებით სამართლიანი და ობიექტური არ არის, სწორედ ამიტომ მათთვის საინტერესო არაა.