უკრაინის პრეზიდენტი ვოლოდიმირ ზელენსკი მადლობას უხდის ქვეყნებს მხარდაჭერისთვის და აღნიშნავს, რომ ყველა ქვეყანას არ ჩამოთვლის, რადგან არ უნდა ზოგიერთს შერცხვეს.

"მადლობელი ვარ ყველა ქვეყნის, ვინც დღეს მხარს უჭერს უკრაინას — სიტყვით, დეკლარაციით, კონკრეტული დახმარებით; მათ, ვინც დღეს ჩვენს მხარესაა, სიმართლის და საერთაშორისო სამართლის მხარეს… არ ჩამოვთვლი სათითაოდ, არ მინდა რომ ზოგიერთ სხვა ქვეყანას შერცხვეს. ეს მათი საქმეა, მათი კარმა და ეს მათ სინდისზეა. არ ვიცი, როგორ შეძლებენ ისინი, აუხსნან საკუთარი ქმედებები უკრაინაში 2 მოკლულ და 3 დაჭრილ ჯარისკაცს და რაც მთავარია, 3 გოგოს კიევიდან — ერთი 10 წლისაა, მეორე 6-ის, მესამე მხოლოდ 1-ის. დღეს ისინი მამის გარეშე დარჩნენ, დილის 6 საათზე, ცენტრალური ევროპის დროით", — თქვა მან მიუნხენის კონფერენციაზე სიტყვით გამოსვლისას.

ზელენსკიმ ბოლო დღეებში და წინა წლებში რუსეთთან ომში გარდაცვლილი ჯარისკაცების ხსოვნას პატივი მიაგო.

"მარადიული ხსოვნა მას. მარადიული ხსოვნა ყველა გარდაცვლილს დღეს და ომის წინა წლებში. სამუდამო ჯოჯოხეთი ყველას, ვისაც არ უნდა ეს შეაჩეროს. სამუდამო დიდება ყველას, ვინც იბრძვის და აგრძელებს ბრძოლას მშვიდობისთვის, თავისუფლებისთვი. დიდება უკრაინას", — თქვა მან.

კონფერენციაზე უკრაინის პრეზიდენტმა ასევე აღნიშნა, რომ აფასებენ ნებისმიერ დახმარებას, თუმცა ყველამ უნდა იცოდეს, რომ ეს არ არის საქველმოქმედო შემოწირულობა ან კეთილი ჟესტი, ეს თითოეული ქვეყნის წვლილია ევროპისა და მსოფლიოს უსაფრთხოებისთვის.