24 წლის სოფია ჟირაუ დაუნის სინდრომის მქონე პირველი მოდელია, რომელიც Victoria's Secret-ის კამპანიის სახე გახდა.პუერტო-რიკოელმა სოფიამ 17 სხვა მოდელთან ერთად Love Cloud-ის კოლექცია წარადგინა, რომლის მიზანიც იყო, რომ თეთრეული ყველა ტიპის ქალისთვის შეექმნათ.

კამპანიის სახეებად Victoria's Secret-მა განსხვავებული ასაკის, კანის ფერისა და სხეულის ფორმების მქონე პროფესიონალი და დამწყები მოდელები შეარჩია. კამპანიაში ასევე ჩართულია ტრანსგენდერი მოდელი ვალენტინა სამპაიოა, რომელიც Victoria's Secret-ს 2019 წელს შეუერთდა.

"ამ დღეზე ვოცნებობდი, ბევრი ვიშრომე და ოცნებაც ახდა.Victoria's Secret-ში დაუნის სინდრომის მქონე პირველი მოდელი ვარ. დიდი მადლობა ყველას, ვინც მხარს მიჭერდა. მადლობა Victoria's Secret-ს, რომელმაც ჩემში მოდელი დაინახა. ეს მხოლოდ დასაწყისია!" — წერს სოფია თავის ინსტაგრამზე.

ბოლო პერიოდში ბრენდი სხვადასხვა კამპანიით ცდილობს, რომ ქალთა მრავალფეროვნებას ხაზი გაუსვას და სექსუალურობის ის ვიწრო იმიჯი გამოასწოროს, რომელსაც წლების განმავლობაში თავად ქმნიდა. მას შემდეგ, რაც ბრენდი მრავალჯერ გააკრიტიკეს, Victoria's Secret-მა გადაწყვიტა, რომ თეთრეული ყველა ზომის, ფორმისა და წარმომავლობის ქალისთვის შეექმნა.

ფოტო: Victoria's Secret

Love Cloud-ის კოლექცია ერთ-ერთი ნაბიჯია, რომ ბრენდმა ყველა ქალს მხარი დაუჭიროს და როგორც Victoria's Secret-ის კრეატიული დირექტორი, რაულ მარტინესი, აღნიშნავს, ეს "ბრენდის ევოლუციისთვის გარდამტეხი მომენტია".