თბილისის მუნიციპალური ინსპექციის განცხადებით, სამგორში სამი კაპიტალური შენობა და მსუბუქი კონსტრუქციის ორი ღობის დემონტაჟი მოხდა. ინსპექციის განმარტებით, მათ სამართალდარღვევით აშენებდნენ.

"თბილისის მუნიციპალურმა ინსპექციამ სამართალდარღვევები ერთი კვირის წინ გააფრთხილა, რის შემდეგაც, ერთმა მოქალაქემ მშენებარე ნაგებობის ნაწილობრივი დემონტაჟი თავად განახორციელა", — ნათქვამია განცხადებაში.

11 თებერვალს თბილისის მერიამ განაცხადა, რომ მუნიციპალურმა ინსპექციამ ე.წ აფრიკის დასახლებაში სახელმწიფო მიწაზე უკანონო მშენებლობების რამდენიმე ფაქტი გამოავლინა. როგორც მათ თქვეს, მშენებლობის მწარმოებლებს გააფრთხილეს, რომ ნაგებობები დაანგრიონ, წინააღმდეგ შემთხვევაში, დემონტაჟს თავად განახორციელებენ.

14 თებერვალს აფრიკის მცხოვრებლები მშენებლობების დაკანონების მოთხოვნით, სამგორის გამგეობაში შევიდნენ. მათ განაცხადეს, რომ არცერთი ადამიანი, მითუმეტეს, სოციალურად დაუცველი, უსახლკაროდ არ უნდა დარჩეს და თუ მოთხოვნები არ დაკმაყოფილდება შენობის პიკეტირებას მოახდენენ.

16 თებერვალს, თბილისის მერმა, კახა კალაძემ განაცხადა, რომ ყველა უკანონო მშენებლობის დემონტაჟი განხორციელდება, ხოლო მაცხოვრებლებს მიმართა, რომ "თავი უხერხულ მდგომარეობაში არ ჩაიგდონ" და სახლები თავად დაშალონ.

28 იანვარს მერიამ ორხევის დასახლებაში საცხოვრებელი სახლები დაანგრია. ამაზე, თბილისის მერმა, კახა კალაძემ განაცხადა, რომ დასახლებაში მერიის მიერ დანგრეული სახლების მფლობელებს თბილისში ბინები, ხოლო რეგიონებში მიწის ნაკვეთები აქვთ. მისი თქმით, სახელმწიფო ტერიტორიების უკანონო მშენებლობებზე ყოველთვის ექნება რეაგირება.

აფრიკის დასახლების მცხოვრებლებს სახლები 2020 წლის 15 დეკემბერს დაუნგრიეს. რასაც მოსახლეობის პროტესტი და წინააღმდეგობა მოჰყვა. ადგილზე რამდენიმე ადამიანიც დააკავეს.

დასახლებაში განვითარებულ პროცესებზე საუბრისას, კალაძე აცხადებდა, რომ ქონების უკანონოდ მიტაცება და მასზე შენობა-ნაგებობების განთავსება მიუღებელია. ასევე, ამბობდა, რომ მოსახლეობას სახლები და მიწები აქვთ და ისინი მიწების მიტაცებას მიზანმიმართულად ცდილობენ. პასუხად ადგილობრივებმა თქვეს, რომ ეს მათი დაცინვაა, რადგან ისინი უკიდურეს გაჭირვებაში ცხოვრობენ.