ლედი უისლდაუნის ელიტარული ქრონიკა, 2022 წლის 14 თებერვალი:

ნეტფლიქსის სენსაციად ქცეული სერიალის, Bridgerton-ის, მეორე სეზონის გამოსვლის თარიღი ცნობილია. მეცხრამეტე საუკუნის სამეფო ინტრიგებსა და ახალ სასიყვარულო დრამებში 25 მარტს ისევ ჩავიკარგებით. ნეტფლიქსმა პრემიერის თარიღთან ერთად მეორე სეზონის პირველი ტრეილერიც გაავრცელა.

Bridgerton-ის ახალ სეზონში, რომელიც ჯულია ქუინის ბესტსელერი სერიის მეორე რომანს, The Viscount Who Loved Me-ს, ეფუძნება, ჩვენ ახალ პერსონაჟებსაც შევხვდებით. სიუჟეტი უმეტესწილად დიდგვაროვანი ოჯახის უფროსი შვილისა და ვიკონტის, ლორდ ენტონი ბრიჯერტონის, გარშემო განვითარდება; ეს უკანასკნელი თავისთვის შესაფერის ცოლს ეძებს.

მეორე სეზონის აღმასრულებელ პროდიუსერად კვლავაც ლეგენდარული შონდა რაიმსი მოგვევლინება.

ბრიჯერტონის პირველი სეზონის პრემიერა 2020 წლის დეკემბერში შედგა. სერიალმა მაყურებელთა ყურადღება მალევე მიიპყრო და ნეტფლიქსის ერთ-ერთ ყველაზე წარმატებულ პროექტად იქცა. უკვე დამტკიცებულია სერიალის მე-3 და მე-4 სეზონებიც. ამასთან, მისი შემქმნელები დედოფალ შარლოტას შესახებ ახალ პროექტზეც მუშაობენ.