შრომის ინსპექციის განცხადებით, საქნახშირის ობიექტზე მომხდარი აფეთქების მოკლევის ფარგლებში ადამიანური შეცდომები, კომპანიის მხრიდან შრომის უსაფრთხოების მართვის სისტემის ნაკლოვანებები და საწარმოო პროცესის სხვადასხვა საფეხურზე კონტროლის ნაკლებობა გამოავლინეს. ინსპექციის თქმით, მოკვლევა დასკვნით ფაზაშია და საბოლოო ანგარიში საზოგადოებისთვის უახლოეს პერიოდში გახდება ცნობილი.

"შრომის ინსპექტორთა ჯგუფი აგრძელებს ადგილზე მუშაობას და კომპანიაში არსებული უშუალო და სისტემური პრობლემების იდენტიფიცირებას. მოკვლევის პროცესში შრომის ინსპექციის სამსახურმა შეაჩერა სამუშაო პროცესი. პარალელურად განხორციელდა კომპანიის სრული ინსპექტირება", — ვკითხულობთ განცხადებაში.

შრომის ინსპექციის ცნობით, შახტაში უსაფრთხოების დამატებითი ზომების უკვე მიღებულია და სამუშაო პროცესი აღდგება. მათივე განცხადებით, დაგეგმილია მუდმივმოქმედი სამუშაო ჯგუფის შექმნა, კომპანიის, პროფკავშირებისა და შრომის ინსპექციის თანამშრომელთა მიერ, რომელიც შახტში უსაფრთხოების დაცვას პერმანენტულ მონიტორინგს გაუწევს.

"მიუხედავად იმისა, რომ კომპანია საქნახშირმა ბოლო წლების განმავლობაში მნიშვნელოვანი ნაბიჯები გადადგა უსაფრთხოების სტანდარტების დახვეწასთან დაკავშირებით, შრომის ინსპექციამ დასაქმებულთა უსაფრთხოების უზრუნველსაყოფად, კომპანიას დამატებით, პრევენციული ზომების მიღება დაავალა. შრომის ინსპექციის მოთხოვნით, შახტში უკვე დამონტაჟებულია ელექტრონული აპარატი, რომელიც სამთომოპოვებით პროცესში მეთანის კონცენტრაციის მომატების შემთხვევაში, უზრუნველყოფს მოწყობილობების ავტომატურ გათიშვას, რაც აფეთქების საპრევენციო დამატებით საშუალებას წარმოადგენს. აღნიშნული სისტემა კომპანიაში უკვე ფუნქციონირებს", — წერს შრომის ინსპექცია.

30 იანვარს, გვიან ღამით ტყიბულის შახტაში აფეთქების შედეგად 1 ადამიანი გარდაიცვალა, 8 კი დაშავდა.

8 თებერვალს კომპანია საქნახშირმა გაავრცელა განცხადება, სადაც ნათქვამი რომ მინდელის სახელობის შახტაში მომხდარი აფეთქება ტექნიკური უსაფრთხოების ნორმების დარღვევამ და საგზაო დაცვის სამსახურის მხრიდან აფეთქების ნებართვის გაცემამ გამოიწვია.