რუსეთის პირველმა არხმა უარი თქვა 2017 წლის ევროვიზიის კონკურსის ტრანსლირებაზე, რადგან მათი ქვეყნის წარმომადგენელს, იულია სამოილოვას უკრაინაში შესვლა აუკრძალეს.

BBC-ის ცნობით, ევროპის მაუწყებელთა გაერთიანებამ, რუსეთის პირველ არხს პრობლემის გადაჭრის ორი გზა შესთავაზა, რომ სატელიტის დახმარებით მიეღო მონაწილეობა იულია სამოილოვას, ან სხვა კონკურსანტი აერჩიათ, თუმცა, გაერთიანებამ რუსეთისგან ორივე შეთავაზებაზე უარი მიიღო.

უკრაინამ ევროვიზიაზე რუსეთის წარმომადგენელს ქვეყანაში შესვლა სამი წლით აუკრძალა. მიზეზად კი 2014 წელს ანექსირებულ ყირიმში იულია სამოილოვას მიერ კონცერტის გამართვა დაასახელა.

რუსეთის საგარეო საქმეთა სამინისტროში RIA Novosti-სთან უკრაინის გადაწყვეტილებას "ცინიკური და არაადამიანური" უწოდა.

ევროვიზიის კონკურსი უკრაინაში, კიევში, სავარაუდოდ, მაისში გაიმართება.