პატრიარქის მდივანი მიქაელ ბოტკოველი აცხადებს, რომ ომიკრონის გავრცელების გამო, საპატრიარქოში კარანტინი გამოცხადდა. მისი თქმით, კორონავირუსი მონასტრის წევრებს დაუდასტურდათ და შენობაში ადამიანების შესვლა მაქსიმალურად შეზღუდეს.

"კარანტინი გამოცხადდა მას შემდეგ, რაც ეს ომიკრონის ვირუსი ძალიან აქტუალური გახდა. ძალიან ბევრს, მათ შორის მეც შემხვდა კორონავირუსი და ყველაფერ ამას დაუკავშირდა ეს, მაქსიმალურად შეიზღუდა ადამიანების შესვლა. მონასტრის წევრებსაც დაუდასტურდათ, კი. პატრიარქს კორონავირუსი არ დადასტურებია, მაგრამ ეს მონასტერი, რომელზეც თქვენ საუბრობთ, საპატრიარქოს ეზოში მდებარეობს, რომელსაც პატრიარქის რეზიდენციის იმ ფლიგელთან შეხება არ აქვს", — ამბობს ბოტკოველი მთავარ არხთან.

განახლება: მოგვიანებით საპატრიარქოს საზოგადოებასთან ურთიერთობის სამსახურმა განცხადება გაავრცელა, სადაც ნათქვამია, რომ პანდემიის სირთულიდან გამომდინარე, სხვადასხვა დროს სხვადასხვა სიმკაცრის შეზღუდვები მოქმედებდა, დღეისთვის კი საპატრიარქოში ეს შეზღუდვები გამკაცრებულია, თუმცა გარკვეული სამუშაოები აქტიურად მიმდინარეობს.

ამასთანავე, საპატრიარქო განმარტავს, რომ მონასტერი, რომლის წევრებიც დაინფიცირდნენ, იზოლირებულია და შეხება არ აქვს იმ შენობასთან, სადაც პატრიარქის რეზიდენციაა განთავსებული. განცხადებაში აღნიშნულია, რომ ილია მეორე "თავს დამაკმაყოფილებლად გრძნობს".