თავისუფალი უნივერსიტეტის ინფორმაციით, ანასტასია ბენდუქიძე-გონჩაროვა ცოდნის ფონდის ერთადერთი დამფუძნებელი-მემკვიდრე გახდა.

ცოდნის ფონდი კახა ბენდუქიძემ 2007 წელს დააარსა. ფონდი თავისუფალი უნივერსიტეტისა და საქართველოს აგრარული უნივერსიტეტის დამფუძნებელი ორგანიზაციაა. ანასტასია ბენდუქიძე-გონჩაროვა ფონდის დირექტორიცაა.

The Telegraph-ის ინფორმაციით, გონჩაროვამ 2015 წლის 29 ოქტომბერს ლონდონის უმაღლესი სასამართლოსგან მიიღო უფლება, გამოეყენებინა გარდაცვლილი კახა ბენდუქიძის დნმ-ის ნიმუში, რითიც დაამტკიცებდა, რომ ის კახა ბენდუქიძის შვილია.

გონჩაროვას დნმ-ის ჩატარების უფლებას კახა ბენდუქიძის ქვრივი ნატალია ზოლოტოვა არ აძლევდა და ამბობდა, რომ ანასტასია კახა ბენდუქიძის შვილი არ იყო.

2015 წლის დეკემბერში, მოსკოვის სამედიცინო ექსპერტიზის დასკვნის მიხედვით, ანასტასია ბენდუქიძე-გონჩაროვას და კახა ბენდუქიძის დნმ 99,9996%-ით დაემთხვა.

კახა ბენდუქიძე 2014 წლის 13 ნოემბერს ლონდონში გარდაიცვალა.