ანიმაცია Encanto-ს სიმღერა We Don't Talk About Bruno ნამდვილ სენსაციად იქცა: არა მხოლოდ წლის, არამედ ზოგადად დისნეის სიმღერებს შორის ერთ-ერთი ყველაზე პოპულარული მუსიკალური ნამუშევარი გახდა.

ბოლო კვირების განმავლობაში ყველა ბრუნოზე ლაპარაკობს, ამის მიუხედავად, 8 თებერვალს გამოქვეყნებულ ოსკარების 2022 წლის ნომინანტებს შორის ეს სიმღერა არ აღმოჩნდა: წლის საუკეთესო სიმღერის ნომინაციაში ამ ანიმაციიდან მხოლოდ Dos Oruguitas მოხვდა.

ამ ფაქტმა ბევრის გაკვირვება გამოიწვია და აი, თურმე რაშია საქმე: როგორც Entertainment Weekly წერს, ამ კატეგორიაში თვითონ დისნეიმ წარადგინა მხოლოდ ესპანურენოვანი ბალადა ოსკარებზე და ანიმაციიდან სხვა სიმღერები საკონკურსოდ არ გაუგზავნია.

როცა დისნეიმ ეს გადაწყვეტილება მიიღო, მაშინ We Don't Talk About Bruno ჯერ ჰიტი არ იყო. თან დისნეის ოსკარებზე სიმღერის წარდგენის თავისებური სტრატეგია აქვს ხოლმე: უფრო ემოციურ ბალადებს აგზავნის საკონკურსოდ, ვიდრე ატაცებად ჰიტებს. მაგალითად, პოკაჰონტასიდან Colors of the Wind, მეფე ლომიდან Can You Feel the Love Tonigh და ალადინიდან A Whole New World. ჩამოთვლილი ანიმაციებიდან სხვა უფრო პოპულარული, გაცილებით მხიარული სიმღერებია ცნობილი, მაგრამ ისინი უპირატესობას უფრო "სერიოზულ" შესრულებებს ანიჭებენ.

თანაც ენკანტოდან Dos Oruguitas მართლაც განსაკუთრებით ემოციური სიმღერაა. თუ ის გამარჯვებასაც მოიპოვებს, მაშინ დისნეის პირველი არაინგლისურენოვანი ორიგინალური სიმღერა გახდება, რომელიც ოსკარს მიიღებს.

რაც, შეეხება We Don't Talk About Bruno-ს, ის ამერიკული მუსიკალური ჩარტების ლიდერი გახდა, რითაც პოპულარობით ისეთ ცნობილ ჰიტსაც კი აჯობა, როგორიცაა Let It Go.

აღსანიშნავია ისიც, რომ დისნეიმ Encanto-ს ქართულად გახმოვანებული სიმღერები Spotify-ზე გაავრცელა.

ოსკარების წლევანდელი დაჯილდოების ცერემონია 27 მარტს გაიმართება და სწორედ მაშინ გავიგებთ, ოქროს გლობუსის წარმატებას თუ გაიმეორებს ენკანტო.

იქამდე კი ნახეთ ოსკარის წლევანდელი ნომინანტების სრული სია.