საფრანგეთის პრეზიდენტი, ემანუელ მაკრონი მოსკოვში ვლადიმერ პუტინს შეხვდება. მათი შეხვედრის მთავარი საკითხი უკრაინის მიმართ რუსეთის აგრესია და მოსალოდნელი შეჭრის საფრთხე იქნება. მაკრონის თქმით, მისი ვიზიტი მიზნად ისახავას "რუსეთთან დიალოგსა და დეესკალაციაზე" მოლაპარაკებებს.

Reuters-ის ცნობით, გასული კვირის განმავლობაში საფრანგეთის პრეზიდენტს სატელეფონო საუბრები ჰქონდა რუსეთისა და უკრაინის ლიდერებთან — 8 თებერვალს, სამშაბათს კი ის კიევში ჩავა.

გამოცემას მაკრონთან დაახლოებული ორი სხვადასხვა წყარო ეუბნება, რომ ამ ვიზიტით ის დროის მოგებასა და სიტუაციის გაყინვას ცდილობს, სულ მცირე, ევროპაში მომავალ არჩევნებამდე, მათ შორის, უნგრეთში, სლოვენიასა და საფრანგეთში. წყაროს თქმით, პრეზიდენტისთვის ეს არის შესაძლებლობა, რომ ევროპაში მისი ლიდერობა აჩვენოს.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

3 თებერვალს ამერიკის შეერთებულმა შტატებმა განაცხადა, რომ რუსეთი შეჭრის საბაბად ყალბი ვიდეოს დამზადებას გეგმავდა, სადაც ნაჩვენები იქნებოდა უკრაინელების თავდასხმა რუსეთის ტერიტორიაზე ან რუს სეპარატისტებზე. აშშ-ს ცნობით, ერთ-ერთი ვარიანტი, რომელსაც კრემლი განიხილავს, არის თავდასხმის ინსცენირება და გადაღება, მათ შორის, აფეთქებებისა და მსხვერპლის გამოსახულებები.

ამასთან, როგორც ევროკომისიის ხელმძღვანელმა, ურსულა ფონ დერ ლაიენმა 4 თებერვალს თქვა, თუ რუსეთი უკრაინის მიმართ აგრესიას გააგრძელებს, ევროკავშირს რუსეთის წინააღმდეგ სანქციები აქვს მზად.

გაიგე მეტი: