დაავადებათა კონტროლის ცენტრის ხელმძღვანელის, ამირან გამყრელიძის განცხადებით, იანვარში კორონავირუსის რეინფიცირების 57 ათასზე მეტი შემთხვევა იყო. მისი თქმით, ომიკრონის დამახასიათებელი სწორედ ის არის, რომ ის ძველ შტამებს "გვერდს უვლის" და რეინფიცირება უფრო მაღალი აქვს.

"ომიკრონის ცირკულაცია გაიზარდა. ის 14% იყო რეინფიცირებისა იმ 1800 ლაბორატორიულად დადასტურებულ შემთხვევებში, სადაც სეკვენირება ჩატარდა და ომიკრონ-სპეციფიკური ტესტები იქნა გამოყენებული. აბსოლუტურ რიცხვში დაითვალეს ჩვენებმა და სადღაც, არ მინდა შემეშალოს, მაგრამ 50 ათასზე მეტი, თუ არ ვცდები, 57 ათასამდე რეინფიცირების შემთხვევა იყო იანვარში. ომიკრონის ერთ-ერთი დამახასიათებელი თვისება გახლავთ სწორედ ის, რომ ის ძველ შტამებს გვერდს უვლის და რეინფიცირება მაღალია", — განაცხადა მან რუსთავი 2-თან.

NCDC-ის ხელმძღვანელი ამბობს, რომ ახლა ქვეყანა ვირუსის გავრცელების პიკშია და გაუმჯობესდება თუ არა ეპიდსიტუაცია, ამის შეფასება მომავალ კვირას იქნება შესაძლებელი.

6 თებერვლის მონაცემებით, საქართველოში კორონავირუსის 19 098 ახალი შემთხვევა დადასტურდა, გამოჯანმრთელდა — 17 531, ხოლო გარდაიცვალა 38 ადამიანი.

ბოლო 24 საათში ქვეყნის მასშტაბით ჩატარდა 52 362 კვლევა ტესტით, მათ შორის, 29 383 კვლევა ანტიგენის ტესტით და 22 979 PCR ტესტით.

რაც შეეხება დადებითობის მაჩვენებელს, დღიური არის 36,47%, ბოლო 14 დღის — 30,65%, ბოლო 7 დღის — 27%.