საქართველოს უსაფრთხოების სამსახურში მიიჩნევენ, რომ მათი მთავარი გამოწვევა ოკუპირებული ტერიტორიებია. უწყებაში აღნიშნავენ, რომ საქართველოს ოკუპირებულ ტერიტორიებზე აფხაზეთისა და ცხინვალის რეგიონში დიდი ოდენობით სამხედრო კონტიგენტი და მზარდი მილიტარიზაცია ქართული სახელმწიფოსთვის ეგზისტენციალური საფრთხეა. ამის შესახებ სუს-მა 2016 წლის ანგარიშში აღნიშნა.

"რუსეთის ფედერაციის მხრიდან ოკუპირებული ტერიტორიების ანექსიის მცდელობა, იქ მცხოვრები ეთნიკურად ქართველი მოსახლეობის დისკრიმინაცია, თავისუფალი გადაადგილებისა და განათლების ხელმისაწვდომობის შეზღუდვა, ადგილობრივების უკანონო დაკავება, ე.წ. ბორდერიზაციის პროცესი [მავთულხლართების გავლება] ოკუპირებულ რეგიონებში არსებული მძიმე კრიმინოგენული ვითარება, ასევე ცენტრალური ხელისუფლების მიერ კონტროლირებად საჰაერო სივრცის რუსული საფრენი აპარატების მიერ დარღვევის ფაქტები და ოკუპირებული ტერიტორიების შესახებ საქართველოს კანონის დარღვევა საფრთხეს უქმნის ქვეყნის უსაფრთხოებას," - ვკითხულობთ ანგარიშში.

სუს-ში აღნიშნავენ, რომ ოკუპირებული ტერიტორიებიდან მომდინარე საფრთხეების შეკავების მიზნით მათი უწყება არსებულ ვითარებას ამონიტორინგებს, მიმდინარე პროცესებს აფასებს, ღონისძიებებს და ინფორმაციას აწვდის შესაბამის უწყებებსა და საერთაშორისო პარტნიორებს. '

უსაფრთხოების სამსახური ერთ-ერთ გამოწვევად ოკუპაციის ხაზის გასწვრივ რუსეთის საოკუპაციო ძალების მიერ ე.წ. საზღვრის უკანონო გადაკვეთის ბრალდებით უკანონოდ დაკავებებს ასახელებს. სტატისტიკური მონაცემებით, 2016 წელს ამ ბრალდებით ცხინვალის რეგიონში 134 ადამიანი დააკავეს, საიდანაც 132 იმავე წელს გათავისუფლდა, ერთი წელს, ერთი კი კვლავ უკანონო პატიმრობაშია. ოკუპირებული აფხაზეთის მიმართულებით კი, სუს-მა 193 შემთხვევა დააფიქსირა.