პრემიერმინისტრის, ირაკლი ღარიბაშვილის ინიციატივით სოციალურად დაუცველ ოჯახებს ელექტროენერგიისა და წყლის გადასახადი დაუსუბსიდირდებათ. მთავრობის ადმინისტრაციის ცნობით, შესაბამისი დადგენილება უკვე გამოიცა.

როგორც ცნობილია, სემეკმა ელექტოენერგიის გადასახადი 2020 წლის ბოლოს გაზარდა, თუმცა მთავრობამ იმ საყოფაცხოვრებო მომხმარებლებისთვის, რომლებიც 300 კვსთ-მდე ელექტროენერგიას მოიხმარდნენ გაზრდილი ტარიფი (3,5 თეთრი/1 კვსთ) 2021 წლის განმავლობაში დაასუბსიდირა.

ელექტროენერგიის მოქმედი ტარიფი თბილისში საყოფაცხოვრებო მომხმარებლებისთვის:

  • 0 კვტ.სთ-დან 101 კვტ.სთ-ის ჩათვლით — 18,041 თეთრი/კვტსთ;
  • 101 კვტ.სთ-დან 301 კვტ.სთ-ის ჩათვლით — 22,053 თეთრი/კვტსთ;
  • 301 კვტ.სთ-დან და მეტი — 26,537 თეთრი/კვტსთ.

ელექტროენერგიის მოქმედი ტარიფი რეგიონებში საყოფაცხოვრებო მომხმარებლებისთვის:

  • 0 კვტ.სთ-დან 101 კვტ.სთ-ის ჩათვლით — 17,731 თეთრი/კვტსთ;
  • 101 კვტ.სთ-დან 301 კვტ.სთ-ის ჩათვლით — 21,707 თეთრი/კვტსთ;
  • 301 კვტ.სთ-დან და მეტი — 26,227 თეთრი/კვტსთ.

როგორც დადგენილებიდან ირკვევა, 2022 წელს სუბსიდირება მხოლოდ სოციალურად დაუცველ ოჯახებს შეეხება.

დადგენილების მიხედვით, რეგიონებში მცხოვრები სოციალურად დაუცველები, რომელთა სარეიტინგო ქულა 70 000-ზე ნაკლებია ელექტროენერგიაზე 2015 წლის ივლისში მოქმედ ტარიფს გადაიხდიან — შესაბამისად, მათთვის სუბსიდიის მოცულობა 1 კილოვატ საათზე 8,7 თეთრი იქნება. 2015 წლის ივლისში მოქმედ ტარიფს გადაიხდიან თბილისში მცხოვრები, 70 000-ზე ნაკლები ქულის მქონე სოციალურად დაუცველებიც, თუმცა მათთვის ეს შეღავათი ყოველი წლის 1 აპრილიდან 31 ოქტომბრის ჩათვლით ამოქმედდება.

ამასთან, 2022 წელს რეგისტრირებულ იმ სოციალურად დაუცველ ოჯახებს, რომელთა სარეიტინგო ქულა 70 000-დან 150 000-მდეა და თბილისში არ ცხოვრობენ, მთავრობა ყოველთვიურად მოხმარებული არაუმეტეს 200 კვსთ ელექროენერგიის საფასურს 1 კვსთ-ზე 3,5 თეთრით დაუსუბსიდირებს.

ადმინისტრაციის ინფორმაციითვე, სუბსიდირება განხორციელდება სოციალურად დაუცველი იმ ოჯახებისთვის, რომლებიც მონაცემთა ერთიან ბაზაში 2022 წლის 1 აპრილიდან 2022 წლის 31 ოქტომბრის ჩათვლით დარეგისტრირდებიან, საგრანტო ქულა 70 000-დან 150 000-მდე იქნება და ბაზის მიხედვით, თბილისში იცხოვრებენ.

მთავრობის დადგენილების მიხედვით, სუბსიდირება არ ვრცელდება იმ აბონენტებზე, რომლებიც სარგებლობენ აბონენტების მიერ მაღალმთიან დასახლებაში მოხმარებული ელექტროენერგიის ყოველთვიური საფასურის ანაზღაურების შესახებ დადგენილებით გათვალისწინებული შეღავათებით.

ამასთან, 2022 წლის იანვრიდან 2022 წლის დეკემბრის ჩათვლით რეგისტრირებული ოჯახებისათვის, რომელთა სარეიტინგო ქულა 70 000 ან ნაკლებია და ცხოვრობენ თბილისში, რუსთავში ან მცხეთაში, დაუსუბსიდირდებათ სასმელი წყლის საფასური, არა უმეტეს 100 ლარისა.