ბელარუსი უკრაინას საზღვრის უკანონო კვეთაში ადანაშაულებს. ბელარუსის საგარეო საქმეთა სამინისტრო აცხადებს, რომ 24 იანვარს უკრაინულმა უპილოტო საფრენმა აპარატმა უკანონოდ გადაკვეთა მათი საჰაერო საზღვარი და იგი ბრესტკის სამხედრო პოლიგონზე სადაზვერვო საქმიანობისთვის იყო განკუთვნილი.

"უკრაინულმა უპილოტო საფრენმა აპარატმა 2022 წლის 24 იანვარს უკანონოდ გადაკვეთა ბელარუსის სახელმწიფო საზღვარი, აღმოჩენილი იქნა ჩვენი ქვეყნის საჰაერო სივრცეში და შემდგომ შეიარაღებული ძალების სპეციალისტების მიერ იძულებით დაეშვა. ბორტზე აღჭურვილობის მონაცემების ანალიზის საფუძველზე დადგინდა, რომ ის გაშვებული იყო უკრაინის ტერიტორიიდან ბრესტკის სამხედრო პოლიგონზე უკანონო სადაზვერვო საქმიანობის მიზნით. უკრაინულ მხარეს ეცნობა, რომ ამ არამეგობრული ნაბიჯებით იგი მიზანმიმართულად იწვევს რეგიონში სიტუაციის ესკალაციის პროვოცირებას, რაც არ არის ხელსაყრელი ცივილიზებული ორმხრივი დიალოგისთვის", — ვკითხულობთ ბელარუსის საგარეო საქმეთა სამინისტროს განცხადებაში.

უკრაინის საგარეო საქმეთა სამინისტროს სპიკერი, ოლეგ ნიკოლენკო ბელარუსის განცხადებას Twitter-ზე ეხმაურება და წერს, რომ ეს ბელარუსის მხრიდან მორიგი პროვოკაციაა.

ბელარუსის ხელისუფლების მორიგი პროვოკაცია. მითიური "ტონობით იარაღები" "დრონებით" შეიცვალა. უკრაინას არ გამოუყენებია უპილოტო საფრენი აპარატები. მოვუწოდებთ მინსკს, არ ჩაერიოთ რუსეთის რუსეთის დესტაბილიზაციისკენ მიმართულ ქმედებებში. ბელარუსის და უკრაინის საზღვარზე მშვიდობა მთელი რეგიონის ინტერესია", — წერს ნიკოლენო.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

გაიგე მეტი: