ტეხასში პატარა ბიჭს გმირი მას შემდეგ უწოდეს, რაც მშობლები ხანძრისგან გადაარჩინა. 2 წლის ბავშვის მშობლებმა ყნოსვა COVID-19-ის გამო დაკარგეს და კვამლის სუნი ვერ იგრძნეს, როცა მათ სახლში ხანძარი გაჩნდა.

2 წლის ბრენდონმა მშობლები დილის 5-ის ნახევარზე გააღვიძა და მოსალოდნელი საფრთხის შესახებ მხოლოდ რამდენიმე სიტყვა უთხრა. "დედა, ცხელი, დედა, ცხელი" — მხოლოდ ამას იმეორებდა ბავშვი, როცა მშობლებმა კარში ცეცხლის ალი დაინახეს.

ფოტო: Kayla Dahl

ბრენდონის წყალობით ოჯახმა სახლის დატოვება მანამდე შეძლო, სანამ ის მთლიანად ცეცხლში გაეხვეოდა. "მან მთელი ოჯახი გადაარჩინა, ის ჩვენი პატარა გმირია", — განაცხადა ბრენდონის დედამ ინტერვიუში.

ოჯახმა ხანძრის შედეგად ყველაფერი დაკარგა და ბრენდონის მშობლები ვარაუდობენ, რომ ცეცხლის გაჩენა გაზის გამათბობელმა გამოიწვია. ოჯახის დასახმარებლად შეიქმნა ვებგვერდი, სახელად GoFundMe, რომლის მეშვეობითაც მსურველებმა 5000 დოლარი ბრენდონსა და მის მშობლებს უკვე გადაურიცხეს.

ფოტო: Kayla Dah

"ძალიან გაგვიმართლა, რომ ამდენმა ადამიანმა სიყვარული და მხარდაჭერა გამოხატა, მათ ძალიან დიდ მადლობას ვუხდით", — განაცხადა ბრენდონის მამამ ABC-თან ინტერვიუში.