2021 წლის 6 იანვარს ვაშინგტონში, კაპიტოლიუმთან ტრამპის მხარდამჭერების აქცია დაპირისპირებაში გადაიზარდა. არეულობის შედეგად რამდენიმე ადამიანი გარდაიცვალა, კაპიტოლიუმში შეჭრილებს კი მოგვიანებით ბრალი წაუყენეს. მათ შორის ერთ-ერთი ჯერემაია კეპლინგერია, რომელსაც ბრალად კაპიტოლიუმის საკუთრების დაზიანება ედება. რაც არ უნდა გასაკვირი იყოს, კეპლინგერისთვის დანაშაულის ჩადენის განზრახვის დასამტკიცებლად ბრალდების მხარემ სამეფო კარის თამაშებიდან სერსეი ლანისტერის ცნობილი ფრაზა გამოიყენა.

როგორც აღმოჩნდა, კაპიტოლიუმში შეჭრიდან 2 დღის შემდეგ ბრალდებულმა სოციალურ ქსელში ამერიკის რევოლუციიდან ჯარისკაცის ფოტო შემდეგი წარწერით გამოაქვეყნა: "როგორც ლანისტერი იტყოდა, მე ძალადობას ვირჩევ".

სასამართლო დოკუმენტების მიხედვით, ბრალდების მხარემ მიუთითა, რომ სერსეი ლანისტერი გამოგონილი პერსონაჟია, რომელსაც ფანატიკოსების ჯგუფი დაუმორჩილებლობის შემთხვევაში ძალადობით ემუქრებოდა. "მე ძალადობას ვირჩევ (I choose violence)", — ასე პასუხობს სერსეი მუქარას. ბრალდების მხარის მტკიცებით, ამ ფრაზის გამოყენება დანაშაულის ჩადენის განზრახვაზე მიუთითებს.

"იმის განცხადებით, რომ ძალადობას ირჩევდა, სერსეი ლანისტერმა მასობრივი ხოცვა-ჟლეტის მზაობა გამოხატა, შემდეგ კი პოლიტიკური მიზნების მისაღწევად ეს განზრახვა განახორციელა კიდეც. 6 იანვრის მოვლენებიდან 2 დღის შემდეგ კეპლინგერის პოსტში ამ ფრაზის გამოყენება შემაშფოთებელია და მის ფსიქოლოგიურ მდგომარეობასა და დანაშაულის ჩადენის განზრახვაზე მიგვითითებს", — ვკითხულობთ სასამართლოს დოკუმენტებში ბრალდების მხარის პოზიციას.

ბრალდების მხარე აგრეთვე იმასაც აღნიშნავს, რომ სერსეიმ "მასობრივი განადგურების იარაღი" დედაქალაქის მთავარი შენობების ასაფეთქებლად გამოიყენა, რომლებშიც "პოლიტიკური და რელიგიური" ლიდერები იმყოფებოდნენ.

კაპლინგერს განაჩენს 1-ლ თებერვალს გამოუტანენ. მას 6 თვემდე პატიმრობა ემუქრება.