1-ლი მარტიდან ზონალურ-საათობრივი პარკირების სისტემა თბილისის კიდევ სამ რაიონში ამოქმედდება. ეს რაიონებია მთაწმინდა, ჩუღურეთი და დიდუბე. გარდა ამისა, საბურთალოს რაიონში ზონალურ-საათობრივი პარკირებისთვის დამატებითი ადგილები გამოიყოფა. ამის შესახებ თბილისის მერმა, კახა კალაძემ დედაქალაქის მთავრობის სხდომის დაწყებამდე განაცხადა.

„ზონალურ-საათობრივი პარკირება დიდუბის რაიონში მოიცავს წერეთლისა და ცაბაძის ქუჩებს, ჯამში, 90 საპარკინგე ადგილით. ჩუღურეთის რაიონში, 13 ქუჩაზე გამოიყოფა, ჯამში, 497 საპარკინგე ადგილი. მთაწმინდის რაიონში, თავისუფლების მოედანსა და 32 ქუჩაზე ამოქმედდება, ჯამში, 1 116 ადგილი.

საბურთალოს რაიონში დაემატება სამი ქუჩა, კერძოდ, ჩიქოვანის, ბალანჩივაძეებისა და ჩაილურის ქუჩები, ჯამში, 135 ადგილით. ამ რაიონებში, ზონალურ-საათობრივი პარკირებისთვის სულ 1 838 ადგილიდან 44 განკუთვნილი იქნება შეზღუდული შესაძლებლობის მქონე პირთა ავტომანქანების პარკირებისთვის, ხოლო ოთხი ადგილი ელექტრომობილების დამუხტვისთვის", — განაცხადა კახა კალაძემ.

მისი ინფორმაციით, 1-ლი თებერვლიდან აღნიშნულ რაიონებში, პარკირებისთვის გამოყოფილ ადგილებში სპეციალური ჯიხურები დაიდგმება, სადაც მოქალაქეები რეგისტრაციის გავლას შეძლებენ.