შინაგან საქმეთა სამინისტროსთან შშმ მოზარდზე ძალადობის გასაპროტესტებელ აქციაზე პარტია დროას წევრისა და აქტივისტის, შუშანა მაცაბერიძის დაშავების საქმეზე სახელმწიფო ინსპექტორის სამსახურმა გამოძიება დაიწყო.

როგორც უწყებაში On.ge-ს განუცხადეს, გამოძიება სისხლის სამართლის კოდექსის 333-ე მუხლის მე-3 ნაწილის ბ ქვე ბუნქტით მიმდინარებს, რაც სამსახურეობრივი უფლებამოსილების ძალადობით გადამეტებას გულისხმობს.

მაცაბერიძის განცხადებით, სამართალდამცავმა მას მუცელში ჩაარტყა. ადგილზე სასწრაფო დახმარება იყო გამოძახებული.

"ძალადობრივი ქმედებით გამომათრიეს და ვიღაც პოლიციელი მირტყავდა მუცელში", — თქვა აქტივისტმა TV პირველთან.

ამასთანავე, აქციაზე აქტივისტი ნატა ფერაძე დააკავეს. პოლიცია აქტივისტებს სტიკერების გაკვრის უფლებას არ აძლევდა. ადგილზე ვითარება რამდენჯერმე დაიძაბა.

კადრები, სადაც ჩანს, რომ პოლიციელი მოქალაქეს სცემს, გუშინ, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.