უკრაინის სახალხო დამცველი, ლუდმილა დენისოვა საქართველოს იუსტიციის მინისტრს, რატი ბრეგაძეს მიმართავს და მიხეილ სააკაშვილისთვის კვალიფიციურ ფსიქოლოგიურ და ფიზიკურ რეაბილიტაციას ითხოვს. ამის შესახებ მან Facebook-პოსტში ისაუბრა და ასე გამოეხმაურა ომბუდსმენის შექმნილი ექიმთა ჯგუფის მიერ დღეს გამოქვეყნებულ დასკვნას.

"მიხეილ სააკაშვილს, რომელიც გორის სამხედრო ჰოსპიტალიდან რუსთავის ციხეში ძალით გადაიყვანეს, ფსიქოლოგიური და ფიზიკური რეაბილიტაცია სჭირდება. ეს დასკვნა ომბუდსმენის მიერ შექმნილი კონსილიუმის ექიმებმა გააკეთეს. მას აქვს პოსტტრავმული სტრესული აშლილობა და დეპრესია, რომელსაც ციხის პირობებში ვერ უმკურნალებენ. სააკაშვილის ჯანმრთელობის მდგომარეობა კი მუდმივად უარესდება.

ამასთან, კონსილიუმის ექიმებმა აღნიშნეს, რომ მკურნალობის მეთოდოლოგიაში არსებითი ცვლილებები არ არის. სააკაშვილი, ძირითადად, სამედიცინო თერაპიას იღებს, ფსიქოლოგიური და ფიზიკური რეაბილიტაციის გარეშე. ამიტომ, საქართველოს იუსტიციის მინისტრს მივმართავ, რომ უზრუნველყოს კვალიფიციური ფსიქოლოგიური და ფიზიკური რეაბილიტაცია უკრაინის მოქალაქე სააკაშვილისთვის", — წერს ის.

დღეს სახალხო დამცველმა, ნინო ლომჯარიამ განაცხადა, რომ რეკომენდაციები, რომელიც ნოემბრის ბოლოს გასცეს, შესრულებული არ არის. მისი თქმით, თუ ვითარება არსებითად არ შეიცვლება, ისინი ექსპრეზიდენტთან დამატებით ვიზიტს აღარ განახორციელებენ. თუმცა ომბუდსმენმა აქვე განმარტა, რომ ექიმთა კონსილიუმი მუშაობას არ წყვეტს და საჭიროების შემთხვავაში იმოქმედებენ.