ჯანდაცვის მსოფლიო ორგანიზაციის (WHO) ხელმძღვანელი, ტედროს ადანომ გებრეისუსი აცხადებს, რომ კორონავირუსის პანდემიის დასასრული ახლოსაც კი არ არის.

"პანდემია დასასრულთან ახლოსაც კი არ არის და გლობალურად ომიკრონის შემთხვევების დაუჯერებელი ზრდასთან ერთად, სავარაუდოდ, ახალი ვარიანტები გამოჩნდება, რის გამოც თვალყურის დევნება და შეფასება ისევ კრიტიკულად მნიშვნელოვანია", — განაცხადა მან პრესკონფერენციაზე.

ჟენევაში, ჯანდაცვის მსოფლიო ორგანიზაციის შტაბ-ბინაში გამართულ პრესკონფერენციაზე გებრეისუსმა, ასევე, განაცხადა, რომ ომიკრონის შტამმა გასული კვირის განმავლობაში გამოიწვია ინფიცირების ახალი 18 მილიონი შემთხვევა მთელს მსოფლიოში.

"შეცდომა არ დაუშვათ, ომიკრონი იწვევს ჰოსპიტალიზაციასა და სიკვდილს, ნაკლებად მძიმე შემთხვევებითაც კი იტვირთება სამედიცინო დაწესებულებები", — ამბობს ჯანდაცვის მსოფლიო ორგანიზაციის დირექტორი.

მანვე თქვა, რომ განსაკუთრებით წუხს იმ ქვეყნების გამო, სადაც ვაქცინაციის დაბალი მაჩვენებელია.