Tbilisi Pride უერთდება სანატორიუმ ქართლის შენობაში მცხოვრები დევნილების მოთხოვნას მათი ალტერნატიული საცხოვრებელი ფართებით დაკმაყოფილების შესახებ. ორგანიზაციაში აცხადებენ, პრობლემაა არა მხოლოდ როგორც მოქმედი, ისე წინა მთავრობების გულგრილი დამოკიდებულება საკითხის მიმართ, არამედ საზოგადოებაში არსებული სტიგმა და სტერეოტიპები დევნილი მოსახლეობის შესახებ.

"უნდა ითქვას, რომ გულგრილობაში მხოლოდ მოქმედ, თუ წინა მთავრობებს ვერ დავდებთ ბრალს. მთავრობების პოლიტიკას ზურგს უმაგრებს საზოგადოებაში არსებული სტიგმა და სტერეოტიპები დევნილი მოქალაქეების შესახებ.

თბილისი პრაიდი სამძიმარს უცხადებს გარდაცვლილის ოჯახს, მეზობლებს და ყველა დევნილს. ჩვენ ვუერთდებით სანატორიუმი "ქართლის" მაცხოვრებლების მოთხოვნებს ადეკვატური საცხოვრისით მათი უზრუნველყოფის შესახებ, აგრეთვე, ვითხოვთ ღირსეულ საცხოვრისს ყველა დევნილისთვის!" — ვკითხულობთ ორგანიზაციის მიერ გავრცელებულ განცხადებაში.

ორგანიზაცია ეხმაურება 16 იანვარს, დევნილის გარდაცვალების შესახებ ჯანდაცვის მინისტრის, ზურაბ აზარაშვილის განცხადებასაც.

"პრემიერმინისტრი დუმს, ჯანდაცვის მინისტრის განცხადებით კი, ეს თვითმკვლელობა "უბედური შემთხვევა" იყო და დევნილების პრობლემასთან კავშირი არ აქვს. ამგვარად, მათ შეურაცხყვეს გარდაცვლილი და ისევ და ისევ უგულებელყვეს ღირსეულ საცხოვრისთან დაკავშირებით დევნილების არსებული პრობლემები", — აცხადებენ ორგანიზაციაში.

სანატორიუმ ქართლის მაცხოვრებლების თქმით, შენობაში ახალი ბზარები გაჩნდა, ხოლო, ერთ-ერთი დევნილის სახლში ჭერი ჩამოინგრა. ისინი აღნიშნავენ, რომ ჯანდაცვის მინისტრის, ზურაბ აზარაშვილის მიერ დასახლებაში მომხდარის "უბედური შემთხვევად" მოხსენიება არასწორია.

16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა. სანატორიუმის ყოფილ შენობაში მცხოვრები დევნილები საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. რამდენიმე კვირაა პასუხისმგებელ პირებთან, მათ შორის ჯანდაცვის მინისტრთან შეხვედრას ითხოვენ. საქმეზე გამოძიება თვითმკვლელობამდე მიყვანის მუხლით დაიწყო.

17 იანვარს ჯანდაცვის მინისტრმა, ზურაბ აზარაშვილმა განაცხადა, რომ სანატორიუმ ქართლში მომხდარი ფაქტი "უბედური შემთხვევაა" და ის დევნილთა პრობლემებს არ უნდა დაუკავშირონ.

გაიგე მეტი: