პრემიერმინისტრი ირაკლი ღარიბაშვილი ამტკიცებს, რომ საქართველოს ტექნიკური უნივერსიტეტი რეგიონის ლიდერია ამ სფეროში მეცნიერების განვითარებისა და კადრების მომზადების კუთხით. ეს განცხადება პრემიერმინისტრმა უნივერსიტეტის 100 წლის იუბილისადმი მიძღვნილ ღონისძიებაზე გააკეთა.

"დაარსებიდან მალევე უნივერსიტეტი გადაიქცა საინჟინრო კადრების უდიდეს და შეიძლება ითქვას, მთავარ სამჭედლოდ, რომელიც უმნიშვნელოვანეს როლს ასრულებდა ქართული მეცნიერებისა და მთელი რეგიონის ეკონომიკის განვითარებაში.

თამამად შეიძლება ითქვას, რომ დღიდან დაარსებისა, ამ უნივერსიტეტის სახელთანაა დაკავშირებული აღმშენებლობის ყველა პროცესი საქართველოში. ეს ტრადიცია დღესაც გრძელდება და უნივერსიტეტი უმაღლესი დონის პროფესიონალთა მომზადებისა და ტექნიკური მეცნიერებების განვითარების მხრივ, რეგიონში აღიარებულ ლიდერად რჩება", — განაცხადა ირაკლი ღარიბაშვილმა.

პრემიერმინისტრმა განაცხადა, რომ უნივერსიტეტის 100 წლის იუბილესთან დაკავშირებით, მისი მე-6 კორპუსის რეაბილიტაცია დაიწყება. საიუბილეო ღონისძიებას ღარიბაშვილთან ერთად განათლებისა და მეცნიერების მინისტრი, მიხეილ ჩხენკელიც დაესწრო.

აღსანიშნავია, რომ სწორედ 100 წლის იუბილესთან დაკავშირებით "ქვეყნის აღორძინებაში შეტანილი განსაკუთრებული წვლილისთვის" კათოლიკოს-პატრიარქმა, ილია მეორემ უნივერსიტეტი წმინდა გიორგის ორდენით დააჯილდოვა.