ინფექციური საავადმყოფოს დირექტორის, თენგიზ ცერცვაძის განცხადებით, ხელისუფლების მხრიდან აღსრულებაზე კონტროლი ძალიან სუსტია. ცერცვაძე დამატებითი შეზღუდვების "კატეგორიული" წინააღმდეგია, თუმცა აღნიშნავს, რომ აღსრულების მექანიზმები უნდა გაძლიერდეს.

ცერცვაძე ამბობს, რომ საჭიროა "ოქროს ბალანსის დაცვა". მისივე თქმით, კიდევ ერთი პრობლემა პირბადეების მოხმარების დაბალი მაჩვენებელია, რაშიც ის, როგორც მოსახლეობის, ასევე, მთავრობის ბრალეულობასაც ხედავს.

"აქ მთავრობის ბრალიც არის და მოსახლეობისაც, ეს არის პირბადეების დაბალი მოხმარება. ამას რა უნდა?! — გვიყვარდეს ერთმანეთი, პატივი ვცეთ ჩვენს ასაკოვნებს, მოხუცებს, ოჯახის წევრებს. 50 გარდაცვლილი ყოველ დღე, როგორ შეიძლება. პირბადეების ტარება მოსახლეობის პასუხისმგებლობა და ქვეყნის ხელმძღვანელობის მხრივ აღსრულებაზე კონტროლი. ეს ორი არის ძალიან სუსტი ადგილი, თუ ეს ორი გამოსწორდება, ან სანახევროდ გამოსწორდება, გაძლევთ გარანტიას, რომ ჩვენ სხვებზე უკეთ დავძლევთ ომიკრონის გამოწვევას", — თქვა მან პალიტრანიუსის ეთერში.

6 დეკემბერს დაავადებთა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ ქვეყანაში პირბადის ტარების "სამარცხვინო მაჩვენებელი" — 28%-ია.