დევნილები ჯანდაცის სამინისტროსკენ საპროტესტო მსვლელობას მართავენ. აქციის ერთ-ერთი მონაწილის თქმით, მათი პრობლემები არცერთ უწყებას "არ აინტერესებს". მან პრემიერმინისტრ ირაკლი ღარიბაშვილს შეხვედრისა და მათი პრობლემების გათვალისწინებისკენ მოუწოდა.

"დღეს დასკვნა გამოვიტანეთ, რომ ჩვენ აღარ ვაინტერესებთ არავის, ჩვენ მოვყვებით თუ არა ამ ნანგრევებში, აღარ აინტერესებს არცერთ უწყებას. მე პირადად აქედან არ მივმართავ ჯანდაცვის სამინისტროს, ახლა მივმართავ ბატონ ირაკლი ღარიბაშვილს — კეთილი ინებოს და მოგვაქციოს ყურადღება, მოვიდეს ჩვენამდე და გაიაზროს და გაითვალისწინოს თითოეული ჩვენი პრობლემა, ჩვენი ახირება არ არის, ჩვენ ვართ საშიშორების ქვეშ", — განაცხადა აქციის ერთ-ერთმა მონაწილემ ფორმულასთან.

ჯანდაცვის სამინისტროს ცნობით, დღეს მინისტრის მოადგილე, ილია ღუდუშაური ნაძალადევის რაიონში მდებარე ყოფილ სანატორიუმ ქართლში მცხოვრებ დევნილებს შეხვდა. როგორც სამინისტროს განცხადებაში ვკითხულობთ, ყოფილ სანატორიუმში მცხოვრები დევნილები ახალ საცხოვრებელ ფართებს 2022 წელს მიიღებენ, მანამდე კი სამინისტროს წარმომადგენლებმა ოჯახებს კვლავ დროებით ქირით გადასვლისკენ მოუწოდეს.

30 დეკემბერს თემქაზე დევნილებმა აქცია გამართეს. ისინი ამბობდნენ, რომ მათი საცხოვრებელი კორპუსი დაზიანებულია და მერიისგან ბინებით უზრუნველყოფას ითხოვდნენ. მოგვიანებით, დევნილთა სააგენტომ ოჯახებს გრძელვადიან განსახლებამდე ქირის თანხით უზრუნველყოფა შესთავაზა. სააგენტოს განცხადებით, ყოფილი სასტუმრო ნამდვილად არის ავარიული ობიექტი, ამიტომ შენობაში ფაქტობრივად მცხოვრებ ყველა ოჯახზე ადმინისტრაციული დაპირება გაიცა და დევნილთა სააგენტომ მათ განსახლების ორი ალტერნატივა შესთავა.