ყოფილი პრეზიდენტის, მიხეილ სააკაშვილის ადვოკატი დიმიტრი საძაგლიშვილი ექსპრეზიდენტთან დახურული ფორმის კომუნიკაციის საშუალებას ითხოვს და ამ პროცესში დახმარებისთვის სახალხო დამცველსა და ადვოკატთა ასოციაციას მიმართავს.

"ადვოკატებს არ გვაძლევენ მასთან პერსონალურად, დახურული ფორმის კომუნიკაციის საშუალებას, რაზეც არაერთხელ გავაკეთეთ განცხადება და მოვითხოვეთ, რომ ეს შეზღუდვები მოხსნილიყო. თუმცა დღემდე მე-12 დაწესებულება და მისი დირექტორი არაფერს არ აკეთებს.

მოვითხოვთ საჯაროდ, კიდევ ერთხელ, რომ მოგვეცეს შესაძლებლობა კანონით დადგენილი წესით მიხეილ სააკაშვილთან კომუნიკაციის და ამ პროცესში დახმარებას ვთხოვთ საქართველოს ადვოკატთა ასოციაციას და სახალხო დამცველს", — თქვა საძაგლიშვილმა.

მან ასევე ისაუბრა, რომ არ აქვთ ინფორმაცია, თუ ვინ ზრუნავს მიხეილ სააკაშვილის ჯანმრთელობის მდგომარეობაზე და რა ნაბიჯები იდგმება ამ მიმართულებით.

ადვოკატებთან კომუნიკაციის კონფიდენციალურობასა და რუსთავის ციხეში ექიმების შეშვებას ითხოვს მიხეილ სააკაშვილიც. ამ მოთხოვნის დაკმაყოფილებისთვის ულტიმატუმის ვადა თვის ბოლოს იწურება. ის 2021 წლის 29 დეკემბერს გორის სამხედრო ჰოსპიტლიდან რუსთავის მე-12 დაწესებულებაში გადაიყვანეს.