გაფრთხილება: სტატია Spider-Man: No Way Home-ის შესახებ სპოილერებს შეიცავს!

როგორც ჩანს, სპაიდერმენის ახალ ფილმში ძველი გმირების გამოჩენა მხოლოდ ფანებისთვის კი არა, ძველი სპაიდერმენებისთვისაც მნიშვნელოვანი მომენტი ყოფილა. ამის შესახებ The Amazing Spider-Man-ის ვარსკვლავმა, ენდრიუ გარფილდმა Entertainment Tonight-თან ინტევრიუში ისაუბრა.

თუ ფილმი უკვე ნახეთ, გეცოდინებათ, რომ Spider-Man: No Way Home-ში ტომ ჰოლანდის სპაიდერმენთან ერთად ენდრიუ გარფილდისა და ტობი მაგუაირის სპაიდერმენიც მონაწილეობენ. ენდრიუს თქმით, მან და ტობი მაგუარიმა გადაწყვიტეს, პრემიერაზე შეპარულიყვნენ და ფილმთან ერთად ფანების რეაქცია ენახათ.

"კინოთეატრში პრემიერაზე ჩემი ბეისბოლის ქუდითა და პირბადით შევიპარე და ფილმს ისე ვუყურე. ტობი მაგუაირთან ერთად წავედი — მე და ტობი კინოთეატრში ერთად შევიპარეთ და არავინ იცოდა, რომ იქ ვიყავით. ეს მშვენიერი მომენტი იყო, რომელიც ერთმანეთს გავუზიარეთ", — ამბობს გარფილდი.

ენდრიუმ ერთ-ერთ ინტერვიუში ფილმის გადაღებების დროს მიღებულ გამოცდილებასა და სპაიდერმენის როლის კიდევ ერთხელ მორგების შესახებაც ისაუბრა:

"არ ველოდი, რომ ოდესმე პიტერ პარკერის როლის შესრულებაზე წინადადებას მივიღებდი. მხოლოდ ფანად ყოფნაც კი აღმაფრთოვანებდა, თუმცა შემდეგ ემი პასკალმა, კევინ ფაიგიმ და ჯონ უოტსმა ამ იდეით დამირეკეს, რაზეც უარი ვერ ვთქვი. ძალიან სახალისოდ, შთამაგონებელად და საინტერესოდ ჟღერდა. თუნდაც როგორც სპაიდერმენის გულშემატკივრისთვის 3 სპაიდერმენის ერთად ნახვის შესაძლებლობა უკვე საკმარისი იყო", — ამბობს ენდრიუ გარფილდი Variety-სთან ინტერვიუში.

ენდრიუს თქმით, გადასაღებ მოედანზე გართობის გარდა, სხვა მსახიობებთან პიტერ პარკერის პერსონაჟზე საუბრის შესაძლებლობაც მიეცა. ენდრიუმ ისიც აღნიშნა, რომ ფილმმა მის სპაიდერმენს, რომელსაც მხოლოდ 2 ფილმი აქვს, სხვადასხვა საქმის დასრულებისა და კითხვებზე პასუხების პოვნის შესაძლებლობაც მისცა, რისთვისაც ძალიან მადლიერია.

ამავე თემაზე: