დეპუტატი ტარიელ ნაკაიძე ნაციონალურ მოძრაობას მოუწოდებს, პარლამენტში შევიდეს. მან გადაწყვეტილება მოუწონა ლეიბორისტული პარტიის ლიდერს, შალვა ნათელაშვილსაც, რომელმაც განაცხადა, რომ პარტიის სურვილის შემთხვევაში პარლამენტში შევა.

"ვფიქრობ სწორი გადაწყვეტილება იქნება თუ ბატონ შალვას ვიხილავთ პარლამენტში. ასევე ნაციონალურმა მოძრაობამ მიზეზების ძიებას თავი დაანებოს და შემოვიდეს პარლამენტში. ამ ეტაპზე მათი მდგომარეობა "ნურც გაფრინდები, ნურც მოფრინდების" ჰგავს — თან არიან პარლამენტში, თან არა.

არსებული პოლიტიკური რეალობა პარლამენტშიც ითხოვს ბრძოლას და ქუჩაშიც, თუმცა ბოიკოტის რეჟიმი ბოლომდე ყველა ოპოზიციურ პარტიას რომ შეენარჩუნებინა, ვადამდელი არჩევნების ძალიან დიდი შანსი იქნებოდა", — წერს ნაკაიძე სოციალურ ქსელში.

გუშინ, 6 დეკემბერს, შალვა ნათელაშვილმა განაცხადა, რომ მისთვის შეიძლება ტრაგედიაც იყოს ამ გადაწყვეტილების მიღება, პარტიის სურვილის შემთხვევაში პარლამენტში შევა.

"ეს ჩემთვის არის სიკვდილი და შეურაცხყოფა, მაგრამ როცა ხალხისა და ქვეყნის ინტერესებზეა საქმე, ამ შემთხვევაში პირადი ემოცია და შეურაცხყოფა ხანდახან მეორეხარისხოვანია, ამიტომ მზად ვიქნები ეს ნაბიჯი გადავდგა, თუ პარტია მიიღებს გადაწყვეტილებას", — განაცხადა ნათელაშვილმა TV პირველის ეთერში.