პირველ იანვარს HBO Max-ზე ჰარი პოტერის პირველი ფილმის გამოსვლიდან 20 წლის იუბილეს აღსანიშნავად სპეციალური ეპიზოდის, ჰარი პოტერის მე-20 იუბილე: ჰოგვორტსში დაბრუნების პრემიერა შედგა. სპეციალურ გადაცემაში ფილმების რეჟისორები და მსახიობები მიიწვიეს, რომლებმაც უამრავი კადრს მიღმა ისტორია გაგვანდეს.

დენიელ რედკლიფმა სხვა ამბებთან ერთად სევერუს სნეიპის როლის შემსრულებლის, ალან რიკმანის ისტორიაც გაიხსენა. როგორც აღმოჩნდა, ალან რიკმანი, რომელიც 2016 წელს გარდაიცვალა, ერთადერთი ადამიანი იყო, რომელსაც ჯოან როულინგმა სნეიპის ბედი წინასწარ გაანდო.

სხვა მსახიობებისგან განსხვავებით, ალან რიკმანმა ჯოან როულინგს სთხოვა, მისთვის სნეიპის შესახებ სიმართლე თავიდანვე გაემხილა, რათა პერსონაჟი უკეთ შეესწავლა. როულინგმა რიკმანს თხოვნა შეუსრულა, შესაბამისად მსახიობმა პირველი ორი ფილმის გადაღებისას უკვე იცოდა, თუ როგორ სრულდებოდა სნეიპის ისტორია.

დენიელ რედკლიფის თქმით, რიკმანს მსახიობები და პირველი ორი ფილმის რეჟისორი, კრის კოლუმბუსიც სთხოვდა, რომ სნეიპის პერსონაჟის შესახებ სიმართლე გაემხილა, თუმცა ალან რიკმანმა სხვებს არაფერი უთხრა.

2011 წელს ერთ-ერთ ინტერვიუში ალან რიკმანმა დაადასტურა, რომ სნეიპის "ორმაგი აგენტობის" შესახებ ჯერ კიდევ მაშინ იცოდა, როცა როულინგს მხოლოდ სამი წიგნი ჰქონდა დაწერილი. მოგვიანებით კი როულინგმა აღნიშნა, რომ ალან რიკმანს სნეიპის ისტორიის დასასრული წინასწარ იმისთვის გაანდო, რომ მსახიობს პერსონაჟის გრძნობები უკეთ გაეგო.

აშკარაა, რომ ალან რიკმანისა და ჯოან როულინგის შეთანხმებამ გაამართლა: ვერავის წარმოგვიდგენია სხვა მსახიობი, რომელიც სნეიპის როლს ისე იდეალურად მოირგებდა, როგორც ეს რიკმანმა შეძლო.

ამავე თემაზე: