მიხეილ სააკაშვილი გლდანის პენიტენციურ დაწესებულებაში სახელმწიფო ინსპექტორის სამსახურის გამომძიებელმა გამოკითხა. გამომძიებელი, ვასილ კაკაშვილი აცხადებს, რომ ექსპრეზიდენტს კითხვები გორის სამხედრო ჰოსპიტალში განვითარებულ მოვლენებთან დაკავშირებით დაუსვა, რაზეც მისგან დეტალური პასუხები მიიღო.

სააკაშვილის ადვოკატი, შოთა თუთბერიძე იმედოვნებს, რომ ინსპექტორი საკითხს დაჩქარებულ ვადებში განიხილავს.

"მივაწოდეთ გამომძიებელს ამომწურავი და სრული ინფორმაცია, რაც შეგვეძლო ამ ფაქტთან დაკავშირებით და იმედი გვაქვს, რომ სახელმწიფო ინსპექტორი ამ საკითხს დაჩქარებულ ვადებში განიხილავს და გამოძიებას რაღაც ტიპის შედეგი ექნება", — განაცხადა მან.

სახელმწიფო ინსპექტორის სამსახურის მიერ ექსპრეზიდენტ მიხეილ სააკაშვილზე 7 დეკემბერს მომზადებულმა დასკვნამ დიდი გამოხმაურება გამოიწვია. დოკუმენტის მიხედვით, იუსტიციის სამინისტრომ პატიმარ მიხეილ სააკაშვილის პერსონალური ინფორმაციის გასაჯაროებით კანონი დაარღვია.

უწყებამ კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. აღსანიშნავია, რომ 19 დეკემბერს ქართული ოცნების თავმჯდომარემ, ირაკლი კობახიძემ თქვა, რომ ინსპექტორის დასკვნას არ ეთანხმება. მისი განცხადებით, ექსპრეზიდენტის უფლებები არ შელახულა და როცა საუბარია იმაზე, რომ მოქალაქეებმა პრეზიდენტი იხილეს ასეთ მდგომარეობაში, სააკაშვილი ადამიანებმა მანამდეც ნახეს "სახურავზე კარლსონივით" და "თმებით როგორ ათრევდა უკრაინელი სამართალდამცავი".

უწყების დასკვნიდან მალევე, ქართულმა ოცნებამ ინსპექტორის სამსახურის გაუქმებაზე კანონპროექტი დააინიცირა, პარლამენტმა ის ოპოზიციის ნაწილის, საერთაშორისო პარტნიორებისა და არასამთავრობო ორგანიზაციების წინააღმდეგობის მიუხედავად, დაჩქარებული წესით განიხილა. საბოლოოდ, 30 დეკემბერს საკანონმდებლო ორგანომ კანონპროექტი დაამტკიცა.