საქართველოს შინაგან საქმეთა სამინისტროს კახეთის პოლიციის დეპარტამენტის ახმეტის რაიონული სამმართველოს და ლაგოდეხის რაიონული სამმართველოს თანამშრომლებმა ორი პირი ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის და ტარების ბრალდებით დააკავეს. ამის შესახებ ინფორმაცია უწყების პრესსამსახური ავრცელებს.

მათივე ინფორმაციით, ახმეტის რაიონის სოფელ ბირკიანში, არარეგისტრირებული ცეცხლსასროლი იარაღი: გლუვლულიანი სანადირო თოფი, ქარხნული წესით დამზადებული კომბინირებული სანადირო თოფი და 48 საბრძოლო ვაზნა ამოიღეს. ლაგოდეხის რაიონის სოფელ თელაში კი, ავტომანქანის ჩხრეკისას, არარეგისტრირებული გადაჭრილი სანადირო თოფი - ე.წ. „აბრეზი“, 2 მასრა და 2 საბრძოლო ვაზნა.

ექსპერტიზის დასკვნით, ამოღებული ცეცხლსასროლი იარაღი და საბრძოლო მასალა ვარგისია სროლისთვის. შსს-ს ინფორმაციით, ორივე დაკავებული დანაშაულს აღიარებს.

გამოძიება ერთ-ერთი პირის მიმართ ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ფაქტზე სისხლის სამართლის კოდექსის 236-ე მუხლის, მეორე ნაწილით მიმდინარეობს. მეორე დაკავებულის მიმართ კი, ამავე კოდექსის მეორე და მესამე ნაწილებით.

სისხლის სამართლის კოდექსის 236-ე მუხლის, მეორე ნაწილით, ცეცხლსასროლი იარაღის საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა ან შენახვა, აგრეთვე სანადირო ცეცხლსასროლი იარაღის ან სპორტული ცეცხლსასროლი იარაღის მართლსაწინააღმდეგო შეძენა ან შენახვა, ჩადენილი არაერთგზის ისჯება თავისუფლების აღკვეთით ვადით ოთხ წლამდე. ამავე კოდექსის მესამე მუხლით კი, ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო ტარება ისჯება თავისუფლების აღკვეთით ვადით ოთხიდან ექვს წლამდე.