თბილისის მერი, კახა კალაძე ამბობს, რომ ექსპრეზიდენტ მიხეილ სააკაშვილს გორის სამხედრო ჰოსპიტალში შესაფერისი მკურნალობა ჩაუტარდა, რის შემდეგაც სასჯელაღსრულების დაწესებულებაში დააბრუნეს.

"გორის ჰოსპიტლიდან პატიმარი სააკაშვილი გახლდათ გაწერილი, მას ყველანაირი მკურნალობა ჩაუტარდა და შესაბამისად, დაბრუნდა შესაბამის დაწესებულებაში", — განაცხადა მან.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გამოაქვეყნა და დაადასტურა, რომ სააკაშვილი რუსთავის ციხეშია.